ന്യൂഡൽഹി: 2023-ലെ മണിപ്പുർ വംശീയ കലാപവുമായി ബന്ധപ്പെട്ട ക്രിമിനൽ കേസുകളുടെ ദൈനംദിന വിചാരണ ഉറപ്പാക്കുന്നതിനായി പ്രത്യേക കോടതികൾ സ്ഥാപിക്കണമെന്ന് സുപ്രീംകോടതി നിർദേശിച്ചു. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മല്യ ബാഗ്ചി, ജസ്റ്റിസ് വി. മോഹൻ എന്നിവരടങ്ങിയ ബെഞ്ചാണ് നിർദേശം മുന്നോട്ടുവച്ചത്.
സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സിബിഐ)യും സംസ്ഥാന പ്രത്യേക അന്വേഷണസംഘവും (എസ്ഐടി) സമർപ്പിച്ച കുറ്റപത്രങ്ങളുടെ പകർപ്പുകൾ പല ഇരകൾക്കും ഇതുവരെ ലഭിച്ചിട്ടില്ലെന്ന് കോടതി നിരീക്ഷിച്ചു. ഒരാഴ്ചയ്ക്കുള്ളിൽ എല്ലാ ഇരകൾക്കും കുറ്റപത്രങ്ങളുടെ പകർപ്പുകൾ കൈമാറാൻ അന്വേഷണ ഏജൻസികൾക്ക് കോടതി നിർദേശം നൽകി.
അന്വേഷണം പൂർത്തിയായ കേസുകളുടെയും ഇപ്പോഴും അന്വേഷണം തുടരുന്ന കേസുകളുടെയും വിശദമായ വിവരങ്ങൾ കോടതിയിൽ സമർപ്പിക്കാൻ അഡീഷണൽ സോളിസിറ്റർ ജനറലിനോട് സുപ്രീംകോടതി ആവശ്യപ്പെട്ടു. എത്ര പ്രത്യേക കോടതികൾ വേണമെന്നത് തീരുമാനിക്കാൻ ഈ വിവരങ്ങൾ സഹായകരമാകുമെന്ന് കോടതി വ്യക്തമാക്കി.
അതേസമയം, കലാപത്തെ തുടർന്ന് കാണാതായ 30 പേരുമായി ബന്ധപ്പെട്ട കേസുകൾ പരിശോധിച്ച് ആവശ്യമായ നടപടികൾ സ്വീകരിക്കാൻ മണിപ്പുർ ഹൈക്കോടതിക്കും സുപ്രീംകോടതി നിർദേശം നൽകി. അന്വേഷണങ്ങൾ വേഗത്തിലാക്കി കുറ്റപത്രങ്ങൾ എത്രയും പെട്ടെന്ന് സമർപ്പിക്കണമെന്നും കോടതി അന്വേഷണ ഏജൻസികളോട് ആവശ്യപ്പെട്ടു.
