ന്യൂഡൽഹി: ശ്രീഹരിക്കോട്ടയിലെ ബഹിരാകാശ നിലയത്തിൽ നിന്ന് ഒരു വർഷത്തിൽ വിക്ഷേപിക്കുന്ന റോക്കറ്റുകളേക്കാൾ കൂടുതൽ തവണയാണ് കോൺഗ്രസ് തങ്ങളുടെ പരാജയപ്പെട്ട ഉൽപ്പന്നം വീണ്ടും വീണ്ടും ലോഞ്ച് ചെയ്യുന്നതെന്ന് പ്രധാനമന്ത്രി നരേന്ദ്ര മോദി. ന്യൂഡൽഹിയിൽ നടന്ന എൻഡിടിവി വേൾഡ് സമ്മിറ്റിൽ പ്രസംഗിക്കവേ, ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയെ പരോക്ഷമായി ലക്ഷ്യമിട്ടായിരുന്നു പ്രധാനമന്ത്രിയുടെ ഈ രൂക്ഷ പരിഹാസം. രാജ്യത്തിന്റെ പുരോഗതിക്കും അന്തസ്സിനും മുകളിൽ സ്വന്തം നേതാവിനെ രാഷ്ട്രീയമായി ഉയർത്തിക്കൊണ്ടുവരാൻ കോൺഗ്രസ് രാജ്യതാൽപ്പര്യങ്ങളെപ്പോലും പണയപ്പെടുത്തുകയാണെന്ന് അദ്ദേഹം കുറ്റപ്പെടുത്തി.
ലോകം മുഴുവൻ പുതിയ ക്രമങ്ങളിലേക്ക് മുന്നേറുമ്പോൾ, ചില രാഷ്ട്രീയ ശക്തികൾ ഇന്ത്യയിൽ അസ്ഥിരതയും അരാജകത്വവും സൃഷ്ടിക്കാൻ ശ്രമിക്കുകയാണെന്ന് പ്രധാനമന്ത്രി പറഞ്ഞു. വിദേശരാജ്യങ്ങളിൽ പോയി സ്വന്തം രാജ്യത്തിന്റെ യശസ്സ് ഇല്ലാതാക്കാനും ഇന്ത്യയുടെ ആഭ്യന്തര കാര്യങ്ങളിൽ വിദേശ ഇടപെടലുകൾ അഭ്യർത്ഥിക്കാനും ഇക്കൂട്ടർ മടിക്കുന്നില്ല. ഒരു കുടുംബത്തിന്റെ പ്രതിച്ഛായ സംരക്ഷിക്കാനും രാഷ്ട്രീയ നാണക്കേട് മറയ്ക്കാനും വേണ്ടി മറ്റു യുവ പ്രതിപക്ഷ നേതാക്കളുടെ വളർച്ചയും അവസരങ്ങളും കോൺഗ്രസ് ഇല്ലാതാക്കുകയാണെന്നും അദ്ദേഹം കൂട്ടിച്ചേർത്തു.
മറ്റുള്ളവരെ വളരാൻ അനുവദിക്കാത്ത ഒരു പരാന്നഭോജിയായി കോൺഗ്രസ് മാറിയെന്ന് ചൂണ്ടിക്കാട്ടിയ മോദി, രാജ്യത്ത് ഉണ്ടാകുന്ന ജനകീയ പ്രതിഷേധങ്ങളെയും മുന്നേറ്റങ്ങളെയും പോലും പാർട്ടി സ്വന്തം സ്വാർത്ഥ താൽപ്പര്യങ്ങൾക്കായി ദുരുപയോഗം ചെയ്യുകയാണെന്ന് ആരോപിച്ചു. ഇത്തരം പരാജയപ്പെട്ട രാഷ്ട്രീയ ശ്രമങ്ങളെ വകവെക്കാതെ രാജ്യം കൂടുതൽ ശക്തമായ വികസന പാതയിലൂടെ മുന്നോട്ട് പോകുമെന്നും പ്രധാനമന്ത്രി വ്യക്തമാക്കി.
