സിഡ്നി: ഓസ്ട്രേലിയയിലെ ‘ഓഫീസ് ഫോർ മൾട്ടികൾച്ചറൽ അഫയേഴ്സ്’ വകുപ്പും ഫെഡറൽ മൾട്ടികൾച്ചറൽ അഫയേഴ്സ് മന്ത്രിസ്ഥാനവും നിർത്തലാക്കണമെന്ന നിർദ്ദേശവുമായി വൺ നേഷൻ പാർട്ടി. ബഹുസംസ്കാരവാദം (മൾട്ടികൾച്ചറലിസം) പരാജയപ്പെട്ട ഒരു സർക്കാർ സിദ്ധാന്തമാണെന്നും അത് സമൂഹത്തിലേക്കുള്ള ലയനത്തെ പ്രോത്സാഹിപ്പിക്കുന്നില്ലെന്നും വൺ നേഷൻ പാർട്ടി സെനറ്റർ ഷോൺ ബെൽ ആരോപിച്ചു. സ്കൈ ന്യൂസ് ഓസ്ട്രേലിയയുടെ ‘സൺഡേ അജണ്ട’ പരിപാടിയിൽ സംസാരിക്കുകയായിരുന്നു അദ്ദേഹം.
ബഹുസംസ്കാരവാദം ഇവിടെ വിജയകരമല്ലെന്നാണ് തങ്ങളുടെ പാർട്ടി വിശ്വസിക്കുന്നതെന്നും അതിനാൽ ഇത് പൂർണ്ണമായും നിർത്തലാക്കണമെന്നും ബെൽ പറഞ്ഞു. ആളുകൾ ഒന്നിലധികം ഭാഷകൾ സംസാരിക്കുന്നതിനെ തങ്ങൾ എതിർക്കുന്നില്ലെന്ന് വ്യക്തമാക്കിയ അദ്ദേഹം, എന്നാൽ സർക്കാർ സേവനങ്ങൾ പൂർണ്ണമായും ഇംഗ്ലീഷിൽ മാത്രമായിരിക്കണം നൽകേണ്ടതെന്നും കൂട്ടിച്ചേർത്തു.
എന്നാൽ ഈ നിർദ്ദേശത്തെ ശക്തമായി എതിർത്തുകൊണ്ട് ഓസ്ട്രേലിയൻ മൾട്ടികൾച്ചറൽ അഫയേഴ്സ് മന്ത്രി ആൻ അലി രംഗത്തെത്തി. തങ്ങൾക്ക് മനസ്സിലാകാത്ത ഭാഷയിലുള്ള സേവനങ്ങളിൽ നിന്നും ജനങ്ങൾ പാർശ്വവൽക്കരിക്കപ്പെട്ടാൽ അവർക്ക് സമൂഹത്തിൽ വിശ്വാസവും മികച്ച അവസരങ്ങളും കെട്ടിപ്പടുക്കാൻ കഴിയില്ലെന്ന് ആൻ അലി വ്യക്തമാക്കി. അതേസമയം വൺ നേഷൻ പാർട്ടിയുടെ ഈ നിർദ്ദേശം നിലവിലെ ഓസ്ട്രേലിയൻ സർക്കാരിന്റെ നയമല്ല.
