പാരീസ്: ജീവിതച്ചെലവ് വർധന, വേതനത്തിലെ അപര്യാപ്തത, പൊതുസേവനങ്ങളുടെ നിലവാരത്തകർച്ച എന്നിവയ്ക്കെതിരെ ഫ്രാൻസിൽ പ്രതിഷേധം ശക്തമാകുന്നു. രാജ്യവ്യാപകമായി നടന്ന വൻ റാലികൾക്കു പിന്നാലെ ഒക്ടോബർ 31ന് വീണ്ടും പ്രതിഷേധം നടത്താനും നവംബർ അഞ്ചിന് രാജ്യവ്യാപക പണിമുടക്ക് സംഘടിപ്പിക്കാനും തൊഴിലാളി സംഘടനകളും പ്രതിഷേധ കൂട്ടായ്മകളും ആഹ്വാനം ചെയ്തു.
കഴിഞ്ഞ ശനിയാഴ്ച നടന്ന പ്രതിഷേധങ്ങളിൽ നാലുലക്ഷത്തിലധികം പേർ പങ്കെടുത്തതായി ഫ്രഞ്ച് ആഭ്യന്തര മന്ത്രാലയം അറിയിച്ചു. എന്നാൽ എട്ടുലക്ഷത്തോളം പേർ പങ്കെടുത്തെന്നാണ് തൊഴിലാളി സംഘടനകളുടെ അവകാശവാദം. പ്രതിഷേധങ്ങൾക്കിടെ അക്രമസംഭവങ്ങൾ തടയുന്നതിനായി രാജ്യത്തുടനീളം 70,000 പൊലീസുകാരെ വിന്യസിച്ചിരുന്നു. സംഭവങ്ങളുമായി ബന്ധപ്പെട്ട് 1,314 പേരെ അറസ്റ്റ് ചെയ്തതായും അമ്പതോളം പൊലീസുകാർക്ക് പരിക്കേറ്റതായും അധികൃതർ വ്യക്തമാക്കി.
2018ൽ ഇന്ധനനികുതി വർധനയ്ക്കെതിരെ രൂപംകൊണ്ട യെല്ലോ വെസ്റ്റ്സ് പ്രസ്ഥാനവും പുതിയ പ്രതിഷേധങ്ങൾക്ക് ആഹ്വാനം ചെയ്തിട്ടുണ്ട്. ടൗൺ ഹാളുകൾക്കും ദേശീയ അസംബ്ലിക്കും മുന്നിൽ ധർണകളും റാലികളും നടത്താനാണ് സംഘടനയുടെ തീരുമാനം. വിദ്യാർഥികളിൽ തുടങ്ങിയ പ്രതിഷേധം തൊഴിലാളികൾ, അധ്യാപകർ, അഗ്നിരക്ഷാസേനാംഗങ്ങൾ തുടങ്ങിയ വിഭാഗങ്ങളിലേക്കും വ്യാപിക്കുന്നതായി തൊഴിലാളി സംഘടനാ നേതാക്കൾ ചൂണ്ടിക്കാട്ടി.
പ്രതിഷേധങ്ങൾക്കിടെ കൊള്ളയും പൊതുമുതൽ നശിപ്പിക്കലും ഉൾപ്പെടെയുള്ള സംഭവങ്ങൾ ആവർത്തിക്കാതിരിക്കാൻ സർക്കാർ സുരക്ഷ ശക്തമാക്കിയിട്ടുണ്ട്. പുതിയ പ്രതിഷേധങ്ങൾക്ക് നിയന്ത്രണങ്ങൾ ഏർപ്പെടുത്തുന്നതും അധികൃതർ പരിഗണിച്ചു. അതേസമയം, പ്രതിഷേധക്കാരുടെ ആവശ്യങ്ങൾ പരിഹരിക്കുന്നതിൽ സർക്കാർ സ്വീകരിച്ച നടപടികൾ പര്യാപ്തമല്ലെന്നാണ് സംഘടനകളുടെ നിലപാട്.
ഫ്രാൻസിനു പുറമേ ബെൽജിയം, അൽബേനിയ, ഇറ്റലി എന്നിവിടങ്ങളിലും ജീവിതച്ചെലവും സർക്കാരിന്റെ നയങ്ങളും സംബന്ധിച്ച് പ്രതിഷേധങ്ങൾ റിപ്പോർട്ട് ചെയ്തിട്ടുണ്ട്. സാമ്പത്തിക സമ്മർദവും പൊതുസേവനങ്ങളുമായി ബന്ധപ്പെട്ട പരാതികളും യൂറോപ്പിന്റെ വിവിധ ഭാഗങ്ങളിൽ സാമൂഹിക അസ്വസ്ഥത വർധിപ്പിക്കുന്ന സാഹചര്യത്തിലാണ് ഫ്രാൻസിൽ വീണ്ടും പ്രക്ഷോഭത്തിനുള്ള നീക്കം.
