ഇറാനിലെ ഭരണക്രമത്തിൽ മാറ്റം വരുത്തുന്നതിനായി മുൻ പ്രസിഡന്റ് മഹ്മൂദ് അഹമദി നജാദിനെ പുതിയ നേതാവായി ഉയർത്തിക്കൊണ്ടുവരാനുള്ള രഹസ്യ പദ്ധതി അമേരിക്കയും ഇസ്രയേലും പരിഗണിച്ചിരുന്നുവെന്ന റിപ്പോർട്ടുകൾ അന്താരാഷ്ട്ര രാഷ്ട്രീയരംഗത്ത് ചർച്ചയാകുന്നു. ന്യൂയോർക്ക് ടൈംസ് പുറത്തുവിട്ട വിവരങ്ങൾ ഉദ്ധരിച്ച് വിവിധ അന്താരാഷ്ട്ര മാധ്യമങ്ങളാണ് റിപ്പോർട്ട് പ്രസിദ്ധീകരിച്ചത്.
റിപ്പോർട്ടുകൾ പ്രകാരം, ഇറാനിലെ പരമോന്നത നേതൃനിരയെ ലക്ഷ്യമിട്ട് നടന്ന സൈനിക നീക്കങ്ങൾക്കുശേഷം ഭരണവ്യവസ്ഥ തകരുമെന്ന കണക്കുകൂട്ടലിലായിരുന്നു ഈ പദ്ധതി രൂപീകരിച്ചത്. ഇറാനിലെ മതനേതൃത്വവുമായി അകന്നുനിന്നിരുന്ന അഹ്മദിനെജാദിനെ ഇടക്കാല നേതാവായി അവതരിപ്പിക്കാമെന്ന ആശയമാണ് പരിഗണിച്ചതെന്ന് റിപ്പോർട്ടുകളിൽ പറയുന്നു. അഹ്മദിനെജാദിന്റെ ടെഹ്റാനിലെ വസതിക്ക് നേരെയുണ്ടായ ആക്രമണം അദ്ദേഹത്തെ മോചിപ്പിക്കാനായിരുന്നുവെന്നും, എന്നാൽ പിന്നീട് അദ്ദേഹം പദ്ധതിയിൽ നിന്ന് പിന്മാറിയതായും അമേരിക്കൻ ഉദ്യോഗസ്ഥരെ ഉദ്ധരിച്ച് റിപ്പോർട്ടുകൾ പറയുന്നു.
നിലവിൽ അദ്ദേഹത്തിന്റെ സ്ഥാനം വ്യക്തമല്ലെന്ന വിവരവും പുറത്തുവന്നു. അതേസമയം, ഈ റിപ്പോർട്ടുകളുടെ വിശ്വാസ്യതയെ കുറിച്ച് ചില വിദഗ്ധർ സംശയം പ്രകടിപ്പിച്ചിട്ടുണ്ട്. അഹ്മദിനെജാദ് ഇസ്രയേൽ വിരുദ്ധ നിലപാടുകൾക്ക് പേരുകേട്ട നേതാവായിരുന്ന സാഹചര്യത്തിൽ ഇത്തരമൊരു പദ്ധതി യാഥാർഥ്യമായിരുന്നോയെന്ന ചോദ്യവും ഉയരുന്നുണ്ട്. ചിലർ ഇത് തെറ്റായ വിവരപ്രചാരണമാകാമെന്നും വിലയിരുത്തുന്നു.
