കൊച്ചി: ഹോങ്കോങ് നടനും ആയോധനകലാ താരവുമായ ജാക്കി ചാൻ മരിച്ചെന്ന തരത്തിൽ സമൂഹമാധ്യമങ്ങളിൽ പ്രചരിക്കുന്ന വാർത്ത വ്യാജം. 72കാരനായ ജാക്കി ചാൻ ജീവനോടെയുണ്ടെന്നും സിനിമാ രംഗത്ത് സജീവമാണെന്നും വിവിധ റിപ്പോർട്ടുകൾ സ്ഥിരീകരിക്കുന്നു.
‘ജാക്കി ചാൻ 1954–2026’ എന്നെഴുതിയ കറുപ്പും വെളുപ്പും നിറത്തിലുള്ള ചിത്രം ഉൾപ്പെടെയുള്ള പോസ്റ്റുകളാണ് സമൂഹമാധ്യമങ്ങളിൽ വ്യാപകമായി പ്രചരിച്ചത്. ചില പോസ്റ്റുകൾക്ക് മണിക്കൂറുകൾക്കുള്ളിൽ ദശലക്ഷക്കണക്കിന് കാഴ്ചകളും ലഭിച്ചു. മരണവാർത്തയ്ക്ക് ഔദ്യോഗിക സ്ഥിരീകരണമൊന്നും ഉണ്ടായിരുന്നില്ല.
ജാക്കി ചാന്റെ ഏറ്റവും പുതിയതായി റിപ്പോർട്ട് ചെയ്യപ്പെട്ട പൊതുപരിപാടി ജൂലൈ ഏഴിന് സിംഗപ്പൂരിലായിരുന്നു. പെച്ചുൻ പബ്ലിക് സ്കൂളിലെ പരിപാടിയിൽ 900ലധികം വിദ്യാർഥികളുമായി അദ്ദേഹം സംവദിക്കുകയും പാട്ടുപാടുകയും ചെയ്തിരുന്നു.
വ്യാജ മരണവാർത്തകൾക്ക് പിന്നാലെ നിരവധി ആരാധകർ സമൂഹമാധ്യമങ്ങളിൽ അനുശോചന സന്ദേശങ്ങൾ പങ്കുവച്ചെങ്കിലും പിന്നീട് പ്രചാരണം തെറ്റാണെന്ന് വ്യക്തമായി. ജാക്കി ചാൻ മുമ്പും സമാനമായ വ്യാജ മരണവാർത്തകൾക്ക് ഇരയായിട്ടുണ്ട്.
