തിരുവനന്തപുരം: തിരുവനന്തപുരം മെഡിക്കൽ കോളേജിലെ റെസിഡന്റ് ഡോക്ടർമാർക്ക് സ്റ്റൈപെൻഡ് വിതരണം ചെയ്യുന്നതിൽ തുടർച്ചയായി ഉണ്ടാകുന്ന കാലതാമസം അതീവ പ്രതിഷേധാർഹമാണെന്ന് ഐ.എം.എ (ഇന്ത്യൻ മെഡിക്കൽ അസോസിയേഷൻ) കേരള സംസ്ഥാന ശാഖ. മാസങ്ങളായി തുടരുന്ന ഈ പ്രതിസന്ധി ഡോക്ടർമാരുടെ ജീവിതത്തെ സാരമായി ബാധിക്കുന്നുവെന്നും വിഷയത്തിൽ അടിയന്തര ഇടപെടൽ വേണമെന്നും ഐ.എം.എ ആവശ്യപ്പെട്ടു.
അഹോരാത്രം ജോലി ചെയ്യുന്ന യുവ ഡോക്ടർമാരോടുള്ള ഈ അവഗണന ആശങ്കാജനകമാണെന്ന് ഐ.എം.എ ഭാരവാഹികൾ വാർത്താക്കുറിപ്പിൽ അറിയിച്ചു. ഓരോ മാസവും കൃത്യസമയത്ത് സ്റ്റൈപെൻഡ് നൽകേണ്ടത് സർക്കാരിന്റെ ഉത്തരവാദിത്തമാണെന്നും, സാങ്കേതിക കാരണങ്ങൾ പറഞ്ഞ് ഇത് നീട്ടിക്കൊണ്ടുപോകുന്നത് അംഗീകരിക്കാനാവില്ലെന്നും സംഘടന വ്യക്തമാക്കി. റെസിഡന്റ് ഡോക്ടർമാരുടെ ന്യായമായ അവകാശങ്ങൾ സംരക്ഷിക്കുന്നതിനായി ശക്തമായ നിലപാടുകളുമായി മുന്നോട്ടുപോകുമെന്നും ഐ.എം.എ മുന്നറിയിപ്പ് നൽകി. വിഷയത്തിൽ ആരോഗ്യവകുപ്പ് അടിയന്തരമായി ഇടപെട്ട് കുടിശ്ശിക തീർക്കണമെന്നാണ് ഡോക്ടർമാരുടെ ആവശ്യം.
