ന്യൂഡൽഹി: ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാര കരാർ (BTA) ചർച്ചകൾ കൂടുതൽ ശക്തമാക്കുന്നതിന്റെ ഭാഗമായി അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഉന്നതതല ഔദ്യോഗിക പ്രതിനിധി സംഘം ജൂൺ 1 മുതൽ 4 വരെ ഇന്ത്യ സന്ദർശിക്കും. യു.എസ് ചീഫ് നെഗോഷ്യേറ്ററുടെ നേതൃത്വത്തിലുള്ള സംഘമാണ് ന്യൂഡൽഹിയിലെത്തുന്നത്. ഇരുരാജ്യങ്ങളും തമ്മിലുള്ള താൽക്കാലിക വ്യാപാര കരാറിന്റെ (Interim Agreement) അന്തിമ രൂപരേഖ തയ്യാറാക്കുകയാണ് ഈ അടിയന്തര സന്ദർശനത്തിന്റെ പ്രധാന ലക്ഷ്യം.
ആഗോള സാമ്പത്തിക രംഗത്ത് ഭാരതം കൈവരിച്ച തന്ത്രപരമായ സ്വാധീനത്തെ അമേരിക്ക എത്രത്തോളം പ്രാധാന്യത്തോടെയാണ് കാണുന്നത് എന്ന് വ്യക്തമാക്കുന്നതാണ് ഈ പുതിയ നീക്കം. കഴിഞ്ഞ ഫെബ്രുവരി 7-ന് ഇരുരാജ്യങ്ങളും ഒപ്പുവെച്ച പരസ്പര പൂരകമായ വ്യാപാര ചട്ടക്കൂടിന്റെ തുടർച്ചയായാണ് ഈ കൂടിക്കാഴ്ച. ഇതിന്റെ ഭാഗമായി ഏപ്രിലിൽ ഇന്ത്യൻ പ്രതിനിധി സംഘം വാഷിംഗ്ടൺ സന്ദർശിച്ച് ചർച്ചകൾ നടത്തിയിരുന്നു.
ഇറക്കുമതി ചുങ്കം, വിപണി പ്രവേശനം (Market Access), കസ്റ്റംസ് ഇളവുകൾ, നികുതിയിതര നിയന്ത്രണങ്ങൾ (Non-Tariff Measures), നിക്ഷേപ പ്രോത്സാഹനം, സാമ്പത്തിക സുരക്ഷാ ഏകോപനം തുടങ്ങിയ നിർണായക മേഖലകളിലെ അസ്വാരസ്യങ്ങൾ പരിഹരിക്കാൻ ഈ നാല് ദിവസത്തെ സന്ദർശനത്തിൽ ചർച്ചകളുണ്ടാകും. യു.എസ് വിദേശകാര്യ സെക്രട്ടറി മാർക്കോ റൂബിയോ അടുത്തിടെ ഇന്ത്യ സന്ദർശിച്ച് പ്രധാനമന്ത്രി നരേന്ദ്ര മോദിയുമായും വിദേശകാര്യമന്ത്രി എസ്. ജയശങ്കറുമായും നടത്തിയ ചർച്ചകൾക്ക് പിന്നാലെയാണ് ഈ ഉന്നതതല സംഘത്തിന്റെ വരവ് എന്നത് ഏറെ പ്രാധാന്യമർഹിക്കുന്നു.
