തിരുവനന്തപുരം: കേന്ദ്ര സർക്കാരുമായി മുൻ എൽഡിഎഫ് സർക്കാർ ഒപ്പുവെച്ച പി.എം. ശ്രീ (PM SHRI) പദ്ധതിയുമായി ബന്ധപ്പെട്ട ധാരണാപത്രത്തിൽ നിന്ന് കേരളത്തിന് ഇനി പിന്മാറാനാകില്ലെന്ന് യുഡിഎഫ് കൺവീനർ അടൂർ പ്രകാശ് വ്യക്തമാക്കി. യുഡിഎഫ് യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
മുൻ സർക്കാർ കേന്ദ്രവുമായി ധാരണാപത്രത്തിൽ ഒപ്പുവെച്ചതിനാൽ അത് ഏകപക്ഷീയമായി ഉപേക്ഷിക്കാൻ കഴിയില്ലെന്നും, പദ്ധതിയുടെ തുടർനടപടികൾ മന്ത്രിസഭാ ഉപസമിതിയുടെ റിപ്പോർട്ട് പരിഗണിച്ച ശേഷമായിരിക്കുമെന്നും അടൂർ പ്രകാശ് പറഞ്ഞു. പദ്ധതിയുടെ ഭാഗമായി ഏതെല്ലാം സ്കൂളുകളെ ഉൾപ്പെടുത്തണമെന്നത് സംസ്ഥാന സർക്കാരാണ് തീരുമാനിക്കുകയെന്നും അദ്ദേഹം വ്യക്തമാക്കി.
കേന്ദ്രത്തിൽ നിന്ന് സംസ്ഥാനത്തിന് ലഭിക്കേണ്ട വിദ്യാഭ്യാസ ഫണ്ടുകൾ ഉറപ്പാക്കുന്നതിനുള്ള നടപടികളുടെ ഭാഗമായാണ് ഈ നിലപാടെന്നും യുഡിഎഫ് നേതൃത്വം അറിയിച്ചു. അതേസമയം, ഫണ്ട് വിനിയോഗം ഉൾപ്പെടെയുള്ള കാര്യങ്ങളിൽ അന്തിമ തീരുമാനങ്ങൾ സംസ്ഥാന സർക്കാർ തന്നെ കൈക്കൊള്ളുമെന്നും അടൂർ പ്രകാശ് പറഞ്ഞു.
