കോതമംഗലം: തൊടുപുഴയെയും കോതമംഗലം മേഖലയെയും ബന്ധിപ്പിക്കുന്ന പ്രധാന പാതയായ വെങ്ങല്ലൂർ – ഊന്നുകൽ സംസ്ഥാന പാത 44 (SH 44) വീതികൂട്ടി നവീകരിക്കണമെന്ന ആവശ്യം ശക്തമാകുന്നു. പതിറ്റാണ്ടുകൾക്ക് മുൻപ് നിർമ്മിച്ച ഈ റോഡിലൂടെ ദിനംപ്രതി ആയിരക്കണക്കിന് വാഹനങ്ങളാണ് കടന്നുപോകുന്നത്. എന്നാൽ, കാലാനുസൃതമായ വീതികൂട്ടലോ വികസന പ്രവർത്തനങ്ങളോ നടക്കാത്തതിനാൽ റോഡിലെ കൊടുംവളവുകളും വീതിക്കുറവും കാരണം ഇവിടെ പതിവായി കടുത്ത ഗതാഗതക്കുരുക്കാണ് അനുഭവപ്പെടുന്നത്.
വടക്കൻ ജില്ലകളിൽ നിന്നുള്ള ശബരിമല തീർത്ഥാടകർക്ക് എം.സി. റോഡിലെയും പ്രധാന പട്ടണങ്ങളിലെയും തിരക്കുകളിൽപ്പെടാതെ എളുപ്പത്തിൽ കടന്നുപോകാനുള്ള പ്രധാന സമാന്തര പാത കൂടിയാണിത്. കൂടാതെ മൂന്നാർ, ഭൂതത്താൻകെട്ട്, തട്ടേക്കാട് തുടങ്ങിയ പ്രമുഖ വിനോദസഞ്ചാര കേന്ദ്രങ്ങളിലേക്ക് എത്തുന്ന സഞ്ചാരികളും പ്രധാനമായും ആശ്രയിക്കുന്നത് ഈ റോഡിനെയാണ്. തെക്കൻ ജില്ലകളിൽ നിന്നും ഇതര സംസ്ഥാനങ്ങളിൽ നിന്നും എത്തുന്ന വിനോദസഞ്ചാരികൾക്ക് തിരക്കുകൾ ഒഴിഞ്ഞ് എളുപ്പത്തിൽ മൂന്നാറിലേക്ക് എത്തിച്ചേരാൻ ഈ വഴി ഏറെ സഹായകരമാണ്. ഭാവിയിൽ ആലപ്പുഴ – മൂന്നാർ ടൂറിസം ഇടനാഴിയായി (Tourism Corridor) വികസിപ്പിച്ചെടുക്കാൻ വൻ സാധ്യതകളുള്ള പാത കൂടിയാണിത്. ഹൈറേഞ്ച് മേഖലയിലുള്ളവർക്ക് തൊടുപുഴയിലെയും കോട്ടയത്തെയും പ്രമുഖ ആശുപത്രികളിലേക്കും മെഡിക്കൽ കോളേജ് ഉൾപ്പെടെയുള്ള ഉന്നത ചികിത്സാ സൗകര്യങ്ങളിലേക്കും വേഗത്തിലെത്താനുള്ള ഏറ്റവും പ്രധാനപ്പെട്ട അത്യാഹിത പാതയും ഇതുതന്നെയാണ്.
എന്നാൽ, തിരക്കേറിയ സമയങ്ങളിൽ ആംബുലൻസുകളും സ്കൂൾ വാഹനങ്ങളും ഉൾപ്പെടെ മണിക്കൂറുകളോളമാണ് റോഡിൽ കുടുങ്ങിക്കിടക്കുന്നത്. വലിയ വാഹനങ്ങൾക്ക് പരസ്പരം വശമൊഴിഞ്ഞു കൊടുക്കാൻ പോലും ഇവിടെ ഇടമില്ലാത്ത സ്ഥിതിയാണ്. കാൽനടയാത്രക്കാർക്ക് നടന്നുപോകാൻ ആവശ്യമായ സൗകര്യമില്ലാത്തതും പലഭാഗങ്ങളിലും സംരക്ഷണ ഭിത്തികളോ തെരുവ് വിളക്കുകളോ ഇല്ലാത്തതും വലിയ അപകടഭീഷണി ഉയർത്തുന്നുണ്ട്. അതിനാൽ റോഡ് അടിയന്തരമായി വീതികൂട്ടി ബി.എം. ആന്റ് ബി.സി. നിലവാരത്തിൽ ടാർ ചെയ്യണമെന്നും അപകട വളവുകൾ നിവർക്കണമെന്നും നാട്ടുകാർ ആവശ്യപ്പെടുന്നു. വിഷയത്തിൽ ജനപ്രതിനിധികളും പൊതുമരാമത്ത് വകുപ്പും ഉടനടി ഇടപെട്ട് വികസനത്തിന് ആവശ്യമായ ഫണ്ട് അനുവദിച്ച് നിർമ്മാണ പ്രവൃത്തികൾ ആരംഭിക്കണമെന്നാണ് യാത്രക്കാരുടെയും പ്രദേശവാസികളുടെയും ആവശ്യം.
