വാഷിങ്ടൺ: തായ്വാനിലേക്കുള്ള അമേരിക്കൻ ആയുധ വിൽപ്പന നിർത്തിവയ്ക്കണമെന്ന് യുഎസ് പ്രസിഡന്റ് ഡൊണൾഡ് ട്രംപിനോട് ആവശ്യപ്പെടാൻ ചൈനീസ് പ്രസിഡന്റ് ഷി ജിൻപിങ് ഒരുങ്ങുന്നതായി റിപ്പോർട്ട്. ഈ ആഴ്ച വാഷിങ്ടണിൽ നടക്കുന്ന ട്രംപ്–ഷി കൂടിക്കാഴ്ചയിൽ വിഷയം പ്രധാനമായി ഉന്നയിക്കുമെന്നാണ് റോയിട്ടേഴ്സ് റിപ്പോർട്ട് ചെയ്യുന്നത്.
1982ലെ യുഎസ്–ചൈന സംയുക്ത പ്രസ്താവനയിലെ വ്യവസ്ഥകൾ ചൂണ്ടിക്കാട്ടിയാകും ചൈന നിലപാട് അവതരിപ്പിക്കുക. തായ്വാനിലേക്കുള്ള ആയുധ വിൽപ്പന ക്രമേണ കുറയ്ക്കുമെന്നും ദീർഘകാല ആയുധവിൽപ്പന തുടരാൻ ഉദ്ദേശിക്കുന്നില്ലെന്നും അന്നത്തെ യുഎസ് നിലപാടിൽ വ്യക്തമാക്കിയിരുന്നു. എന്നാൽ, അന്നത്തെ പ്രസിഡന്റ് റൊണാൾഡ് റീഗന്റെ അനുബന്ധ രേഖയിൽ ചൈന തായ്വാൻ വിഷയത്തിൽ സമാധാനപരമായ പരിഹാരത്തിന് പ്രതിജ്ഞാബദ്ധമായി തുടരുന്നതുമായി ആയുധ വിൽപ്പന കുറയ്ക്കുന്നതിനെ ബന്ധിപ്പിച്ചിരുന്നു.
നിലവിൽ തായ്വാനിലേക്കുള്ള പുതിയ ഏകദേശം 14 ബില്യൺ ഡോളറിന്റെ ആയുധ ഇടപാട് ട്രംപ് ഭരണകൂടം അംഗീകരിച്ചിട്ടില്ല. കഴിഞ്ഞ മേയിൽ ഷിയുമായി നടത്തിയ കൂടിക്കാഴ്ചയ്ക്കുശേഷം ഇത് ചൈനയുമായുള്ള ചർച്ചകളിൽ ഉപയോഗിക്കാവുന്ന ‘നല്ല ചർച്ചാ ഉപാധി’യാണെന്ന് ട്രംപ് വിശേഷിപ്പിച്ചിരുന്നു. നേരത്തെ 11 ബില്യൺ ഡോളറിന്റെ ആയുധ പാക്കേജിന് യുഎസ് അംഗീകാരം നൽകിയിരുന്നു.
തായ്വാൻ വിഷയത്തിൽ ചൈനയും യുഎസും തമ്മിൽ വ്യത്യസ്ത നിലപാടുകളാണ് തുടരുന്നത്. തായ്വാനെ സ്വന്തം പ്രദേശത്തിന്റെ ഭാഗമായാണ് ചൈന കാണുന്നത്. അതേസമയം, തായ്വാൻ ഭരണകൂടം ചൈനയുടെ പരമാധികാര അവകാശവാദം അംഗീകരിക്കുന്നില്ല. ഔദ്യോഗിക നയപ്രകാരം തായ്വാന്റെ പരമാധികാരത്തെക്കുറിച്ച് യുഎസ് പ്രത്യേക നിലപാട് സ്വീകരിക്കുന്നില്ലെങ്കിലും, തായ്വാന് സ്വയം പ്രതിരോധിക്കാനുള്ള മാർഗങ്ങൾ നൽകുന്നതിന് യുഎസ് നിയമപരമായി ബാധ്യസ്ഥമാണ്.
ഷി ബുധനാഴ്ച വാഷിങ്ടണിലെത്തുമെന്നും വ്യാഴാഴ്ച ട്രംപുമായി ഔദ്യോഗിക ചർച്ചകൾ നടത്തുമെന്നും റിപ്പോർട്ടുണ്ട്. ദേശീയ ആർക്കൈവ്സിലെ സന്ദർശനം വെള്ളിയാഴ്ചയാണ് നിശ്ചയിച്ചിരിക്കുന്നത്. ആയുധ ഇടപാടിൽ തീരുമാനമെടുക്കുമെന്ന് ട്രംപ് ഭരണകൂടത്തിലെ ഉദ്യോഗസ്ഥൻ വ്യക്തമാക്കിയിട്ടുണ്ട്.
