സിഡ്നി: പടിഞ്ഞാറൻ സിഡ്നിയിലെ ഗിൽഡ്ഫോർഡിൽ വീട്ടിൽ അതിക്രമിച്ചുകയറിയ അക്രമിസംഘം 28-കാരനെ പുറകിൽ വെടിവെച്ചു പരിക്കേൽപ്പിച്ചു. ശനിയാഴ്ച രാത്രി 7.40-ഓടെ റാൻഡോൾഫ് സ്ട്രീറ്റിലെ വസതിയിലാണ് നാടിനെ നടുക്കിയ ആക്രമണം നടന്നത്. ഗുരുതരമായി പരിക്കേറ്റ യുവാവ് ആശുപത്രിയിൽ അതീവ ഗുരുതരാവസ്ഥയിൽ തുടരുകയാണ്.
വെടിയേറ്റ യുവാവിന് കുപ്രസിദ്ധമായ അലമെദ്ദീൻ (Alameddine) അധോലോക കുടുംബവുമായി ബന്ധമുണ്ടെന്നാണ് റിപ്പോർട്ട് ചെയ്യുന്നത്. സംഘമായെത്തിയ അക്രമികൾ വീട്ടിനുള്ളിൽ കടന്ന് യുവാവിന് നേരെ വെടിയുതിർത്ത ശേഷം വെള്ള നിറത്തിലുള്ള എസ്യുവി കാറിൽ രക്ഷപ്പെടുകയായിരുന്നു. പ്രതികൾക്കായി പോലീസ് ഊർജ്ജിതമായ തെരച്ചിൽ ആരംഭിച്ചെങ്കിലും ഇതുവരെ ആരെയും അറസ്റ്റ് ചെയ്തിട്ടില്ല.
വെടിയേറ്റയാളുടെ കുടുംബ പശ്ചാത്തലം പോലീസ് ഔദ്യോഗികമായി സ്ഥിരീകരിച്ചിട്ടില്ലെങ്കിലും, ഈ ആക്രമണം വെസ്റ്റേൺ സിഡ്നിയിൽ വീണ്ടും അധോലോക സംഘങ്ങൾ തമ്മിലുള്ള കുടിപ്പകയും സംഘർഷങ്ങളും രൂക്ഷമാക്കുമോ എന്ന ഭീതി ഉയർത്തുന്നുണ്ട്. സിഡ്നിയിലെ വർദ്ധിച്ചുവരുന്ന തോക്ക് അക്രമങ്ങളും ഗുണ്ടാ സംഘങ്ങൾക്കെതിരെ പരോളില്ലാത്ത ജീവപര്യന്തം അടക്കമുള്ള കടുത്ത ശിക്ഷാനടപടികൾ സ്വീകരിക്കേണ്ടതിന്റെ ആവശ്യകതയും ഇതോടെ വീണ്ടും പൊതുചർച്ചയായി മാറുകയാണ്.
