ബ്രിസ്ബേൻ: 2032-ലെ ബ്രിസ്ബേൻ ഒളിമ്പിക്സ് പ്രധാന സ്റ്റേഡിയത്തിന് ചുറ്റും നിർമ്മിക്കാൻ ഉദ്ദേശിക്കുന്ന പാർക്ക്ലാൻഡ് ഏരിയയുടെ പുതിയ രൂപരേഖയും ഡിസൈൻ ചിത്രങ്ങളും ക്വീൻസ്ലാന്റ് സർക്കാർ പുറത്തുവിട്ടു. നഗരത്തിലെ ഏറ്റവും വലിയ പച്ചപ്പ് നിറഞ്ഞ വിക്ടോറിയ പാർക്ക് സ്റ്റേഡിയം നിർമ്മാണത്തിനായി നഷ്ടപ്പെടുന്നു എന്ന ജനങ്ങളുടെ ആശങ്ക പരിഹരിക്കാനാണ് സർക്കാർ പുതിയ ഡിസൈനുകൾ പങ്കുവെച്ചത്. എന്നാൽ, യഥാർത്ഥ പ്രതിസന്ധികളിൽ നിന്ന് ശ്രദ്ധതിരിക്കാനുള്ള “വ്യാജ ചിത്രങ്ങളാണ്” ഇതെന്ന ആരോപണവുമായി പദ്ധതിയെ എതിർക്കുന്നവർ രംഗത്തെത്തി.
വിക്ടോറിയ പാർക്കിൽ 63,000 പേർക്ക് ഇരിക്കാവുന്ന ഒവൽ സ്റ്റേഡിയവും പുതിയ ദേശീയ അക്വാറ്റിക് സെന്ററും നിർമ്മിച്ച ശേഷവും പാർക്കിന്റെ മൂന്നിൽ രണ്ട് ഭാഗവും പച്ചപ്പായി തന്നെ നിലനിർത്തുമെന്നാണ് സർക്കാർ വ്യക്തമാക്കുന്നത്. പ്രകൃതിദത്തമായ തണ്ണീർത്തടങ്ങൾ വികസിപ്പിക്കാനും പൊതുജനങ്ങൾക്കായി ആംഫി തിയേറ്റർ, നടപ്പാലങ്ങൾ എന്നിവ നിർമ്മിക്കാനും പദ്ധതി ലക്ഷ്യമിടുന്നു.
“1988-ലെ എക്സ്പോയിലൂടെ ലഭിച്ച സൗത്ത് ബാങ്ക് പോലെ, 2032 ഒളിമ്പിക്സിന് ശേഷം വരുംതലമുറയ്ക്കായി വിക്ടോറിയ പാർക്ക് വലിയൊരു സമ്മാനമായി മാറും,” എന്ന് പുതിയ പദ്ധതികൾ വിശദീകരിച്ചുകൊണ്ട് ക്വീൻസ്ലാന്റ് പ്രീമിയർ ഡേവിഡ് ക്രിസാഫുള്ളി പറഞ്ഞു.
എന്നാൽ ഈ ഡിസൈനുകളിൽ ഗതാഗത സൗകര്യങ്ങളോ പാർക്കിംഗ് കേന്ദ്രങ്ങളോ കാണിച്ചിട്ടില്ലെന്ന് സഭ പ്രക്ഷോഭകർ ചൂണ്ടിക്കാട്ടുന്നു. ഒളിമ്പിക്സ് ബജറ്റ് വർദ്ധനവിൽ നിന്നും മറ്റ് സാങ്കേതിക തടസ്സങ്ങളിൽ നിന്നും ശ്രദ്ധ തിരിക്കാനാണ് സർക്കാർ ശ്രമിക്കുന്നതെന്ന് ‘സേവ് വിക്ടോറിയ പാർക്ക്’ വക്താവ് സു ബ്രെംനർ ആരോപിച്ചു. സ്റ്റേഡിയത്തിലേക്ക് ആളുകൾ എത്തുന്നതിനുള്ള വഴികളോ പാർക്കിംഗ് കേന്ദ്രങ്ങളോ ഉൾപ്പെടുത്താതെ നൽകിയ ഈ ചിത്രങ്ങൾ ജനങ്ങളെ തെറ്റിദ്ധരിപ്പിക്കുന്നതാണെന്നും അവർ കൂട്ടിച്ചേർത്തു.
