ന്യൂയോർക്ക്: ലോകത്തിന്റെ രാഷ്ട്രീയ, സുരക്ഷാ, നയതന്ത്ര മേഖലകളിൽ വലിയ മാറ്റങ്ങൾക്ക് വഴിവച്ച 2001 സെപ്റ്റംബർ 11ലെ ഭീകരാക്രമണത്തിന് ഇന്ന് 25 വർഷം. അൽഖ്വയ്ദ ഭീകരർ തട്ടിയെടുത്ത നാല് യാത്രാവിമാനങ്ങളാണ് ആക്രമണത്തിന് ഉപയോഗിച്ചത്. ന്യൂയോർക്കിലെ വേൾഡ് ട്രേഡ് സെന്റർ ഇരട്ട ഗോപുരങ്ങൾ, വാഷിങ്ടണിലെ പെന്റഗൺ എന്നിവിടങ്ങളിലേക്കാണ് മൂന്ന് വിമാനങ്ങൾ ഇടിച്ചുകയറ്റിയത്. നാലാമത്തെ വിമാനം പെൻസിൽവാനിയയിൽ തകർന്നുവീണു. ആക്രമണങ്ങളിൽ 2,977 പേർ കൊല്ലപ്പെട്ടു.
ആക്രമണത്തിന് പിന്നാലെ അമേരിക്ക ഭീകരവിരുദ്ധ നടപടികൾ ശക്തമാക്കുകയും അഫ്ഗാനിസ്ഥാനിലും പിന്നീട് ഇറാഖിലും ദീർഘകാല സൈനിക ഇടപെടലുകൾ നടത്തുകയും ചെയ്തു. ആഭ്യന്തര സുരക്ഷാ സംവിധാനങ്ങളിലും നിരീക്ഷണ നടപടികളിലും വലിയ മാറ്റങ്ങളുണ്ടായി. യുഎസ് ആഭ്യന്തര സുരക്ഷാ വകുപ്പ് രൂപീകരിച്ചതും വിപുലമായ ഭീകരവിരുദ്ധ നിയമങ്ങളും നടപടികളും നിലവിൽ വന്നതും 9/11നുശേഷമാണ്.
അമേരിക്കയുടെ വിദേശനയത്തെയും ആഗോള രാഷ്ട്രീയത്തെയും ആക്രമണവും അതിനെ തുടർന്നുണ്ടായ നടപടികളും ഗണ്യമായി സ്വാധീനിച്ചു. അഫ്ഗാനിസ്ഥാൻ, ഇറാഖ് യുദ്ധങ്ങൾ, ഭീകരവിരുദ്ധ പോരാട്ടം, സുരക്ഷാ സംവിധാനങ്ങളുടെ വ്യാപനം തുടങ്ങിയവ അടുത്ത രണ്ട് പതിറ്റാണ്ടിലേറെക്കാലം അന്താരാഷ്ട്ര രാഷ്ട്രീയത്തിലെ പ്രധാന വിഷയങ്ങളായി. 9/11ന് ശേഷമുള്ള അമേരിക്കൻ ഇടപെടലുകൾ ആഗോള ശക്തിസമവാക്യങ്ങളിലും ദീർഘകാല പ്രത്യാഘാതങ്ങൾ സൃഷ്ടിച്ചതായി വിദഗ്ധ വിലയിരുത്തലുകളുണ്ട്.
ആക്രമണത്തിൽ കൊല്ലപ്പെട്ടവരെ അനുസ്മരിച്ച് ന്യൂയോർക്കിലെ ഗ്രൗണ്ട് സീറോ, പെന്റഗൺ, പെൻസിൽവാനിയയിലെ ഷാങ്ക്സ്വിൽ എന്നിവിടങ്ങളിൽ വിവിധ ചടങ്ങുകൾ നടക്കും. 25 വർഷം പിന്നിടുമ്പോൾ ആക്രമണത്തെ നേരിട്ട് ഓർക്കാത്ത ഒരു തലമുറ വളർന്നുവന്ന സാഹചര്യത്തിൽ, 9/11ന്റെ ചരിത്രവും അതിന്റെ ആഗോള പ്രത്യാഘാതങ്ങളും പുതുതലമുറയിലേക്ക് കൈമാറുന്നതും പ്രധാന ചർച്ചയാകുകയാണ്.
