ക്രിസ്തുമസ് ന്യൂ ഇയര് ആഘോഷങ്ങളുടെ വരവായി. നക്ഷത്രങ്ങളും വൈദ്യുതാലങ്കാരങ്ങളും നാടെങ്ങും നിറഞ്ഞു തുടങ്ങി. ആഘോഷങ്ങള്ക്കൊപ്പം അശ്രദ്ധമൂലം അപകടങ്ങളും സര്വ്വ സാധാരണമാണ്. അല്പമൊന്ന് ശ്രദ്ധിച്ചാല് വൈദ്യുതാഘാതമേറ്റുള്ള അപകടങ്ങള് ഒഴിവാക്കാം
അപകടങ്ങള് ഒഴിവാക്കാന് …
താല്ക്കാലിക ആവശ്യത്തിനായി എടുക്കുന്ന കണക്ഷനുകളിലും വൈദ്യുതാലങ്കാര സര്ക്യൂട്ടിലും പ്രവര്ത്തനക്ഷമമായതും 30mA സെന്സിറ്റിവിറ്റിയുള്ള ആര്.സി.സി.ബി സ്ഥാപിച്ചിട്ടുണ്ടെന്ന് ഉറപ്പാക്കണം.
നക്ഷത്ര ദീപാലങ്കാരങ്ങള് കൈകാര്യം ചെയ്യുന്നതിന് കുട്ടികളെ നിയോഗിക്കരുത്.
കണക്ടറുകള് ഉപയോഗിച്ചു വയറുകള് കൂട്ടിയോജിപ്പിക്കുന്നതാണ് സുരക്ഷിതം.
കാലപ്പഴക്കം ചെന്നതും നിലവാരം കുറഞ്ഞതുമായ വയറുകള് ദീപാലങ്കാരത്തിന് ഉപയോഗിക്കരുത്. അലങ്കാരത്തിനുപയോഗിക്കുന്ന സാമഗ്രികള് ഗുണനിലവാരമുള്ളതാണെന്ന് ഉറപ്പുവരുത്തേണ്ടതാണ്.
ഗ്രില്ലുകള്, ഇരുമ്പ് കൊണ്ടുള്ള വസ്തുക്കള്, ലോഹനിര്മ്മിത ഷീറ്റുകള് എന്നിവയിലൂടെ ദീപാലങ്കാരങ്ങള് പാടില്ല.
വീടുകളിലെ എര്ത്തിംങ് സംവിധാനം കാര്യക്ഷമമായി പ്രവര്ത്തിക്കുന്നുണ്ടെന്ന് ഉറപ്പാക്കണം.
ദീപാലങ്കാരങ്ങള് പ്ലഗ് സോക്കറ്റില് കണക്ട് ചെയ്യുമ്പോള് പ്ലഗ് സോക്കറ്റിന്റെ സ്വിച്ച് ഓഫ് ചെയ്ത ശേഷം കണക്ട് ചെയ്യുക, കൂടാതെ കണക്ട് ചെയ്യുന്ന വ്യക്തിയുടെ കൈവിരലുകള് പ്ലഗ്ടോപ്പ് പിന്നില് (Plug top Pin)സ്പര്ശിക്കാതിരിക്കാന് ശ്രദ്ധിക്കണം.
മെയിന് സ്വിച്ചില് നിന്ന് നേരിട്ട് വൈദ്യുതി എടുക്കാന് പാടില്ല.
വൈദ്യുതീകരണത്തിനായി ഉപയോഗിക്കുന്ന വയറുകളില് പൊട്ടലോ കേടുപാടുകളോ ഇല്ല എന്നുറപ്പാക്കണം.
സോക്കറ്റുകളില് നിന്ന് വൈദ്യുതിയെടുക്കുന്നതിനായി അനുയോജ്യമായ പ്ലഗ് ടോപ്പുകള് ഉപയോഗിക്കുക.
ഏതെങ്കിലും അവസരത്തില് ഫ്യൂസ് പോവുകയോ എം സി ബി അല്ലെങ്കില് ആര് സി സി ബി ട്രിപ്പാവുകയോ ചെയ്താല് അതിന്റെ കാരണം കണ്ടെത്തി പരിഹരിച്ചതിന് ശേഷം മാത്രം വീണ്ടും ചാര്ജ് ചെയ്യുക.
