പിടിച്ചെടുത്തത് 40 മില്യൺ ഡോളറിന്റെ ലഹരിശേഖരം
മെൽബൺ: മോഷ്ടിക്കപ്പെട്ട ഒരു ട്രക്കിനെക്കുറിച്ച് നടത്തിയ അന്വേഷണം വിക്ടോറിയ പോലീസിനെ എത്തിച്ചത് മെൽബണിന്റെ പടിഞ്ഞാറൻ പ്രാന്തപ്രദേശത്തുള്ള വൻ കഞ്ചാവ് തോട്ടത്തിലേക്ക്. വിക്ടോറിയയിലെ രണ്ട് വ്യത്യസ്ത കേന്ദ്രങ്ങളിൽ നിന്നായി ഏകദേശം 40 മില്യൺ ഡോളർ വിപണിമൂല്യം വരുന്ന അനധികൃത കഞ്ചാവ് കൃഷിയാണ് പോലീസ് കണ്ടെത്തി നശിപ്പിച്ചത്.
നവംബർ 16 തിങ്കളാഴ്ച ടൂളേൺ വെയ്ലിൽ ചെളിയിൽ പുതഞ്ഞ് ഉപേക്ഷിക്കപ്പെട്ട നിലയിൽ മോഷ്ടിക്കപ്പെട്ട ട്രക്ക് ഡിറ്റക്ടീവുകൾ കണ്ടെത്തുകയായിരുന്നു. തുടർന്ന് ഈ പ്രദേശത്ത് നടത്തിയ പരിശോധനയിലാണ് അഞ്ച് ഗ്രീൻഹൗസുകളിലായി വളർത്തിയിരുന്ന 6,000 മുതൽ 8,000 വരെ പൂർണ്ണവളർച്ചയെത്തിയ കഞ്ചാവ് ചെടികൾ ഉദ്യോഗസ്ഥരുടെ ശ്രദ്ധയിൽപ്പെട്ടത്. ഇവയ്ക്ക് മാത്രം 27 മില്യൺ ഡോളറോളം വിലവരും. തോട്ടത്തിലേക്ക് അനധികൃതമായി വൈദ്യുതി മോഷ്ടിച്ചെടുക്കാൻ ഉപയോഗിച്ചിരുന്ന ഉപകരണങ്ങളും പോലീസ് ഇവിടെനിന്ന് പിടിച്ചെടുത്തു. ഈ തോട്ടത്തിൽ നിന്ന് കഞ്ചാവ് മോഷ്ടിക്കാനായിരിക്കാം ട്രക്ക് അവിടേക്ക് ഓടിച്ചുകൊണ്ടുവന്നതെന്നാണ് പോലീസിന്റെ പ്രാഥമിക നിഗമനം.
ഇതിന് പുറമെ, റോംസിയിൽ നടത്തിയ മറ്റൊരു പ്രത്യേക പരിശോധനയിൽ 620 കിലോഗ്രാം ഭാരം വരുന്ന 3,700 കഞ്ചാവ് ചെടികൾ കൂടി പോലീസ് കണ്ടെത്തി. ഇതോടെ രണ്ട് കേന്ദ്രങ്ങളിൽ നിന്നുമായി പിടിച്ചെടുത്ത കഞ്ചാവിന്റെ ആകെ വിപണിമൂല്യം 40 മില്യൺ ഡോളറായി ഉയർന്നു. രണ്ടിടങ്ങളിൽ നിന്നുമായി ആകെ 11,700-ലധികം കഞ്ചാവ് ചെടികളാണ് ഉദ്യോഗസ്ഥർ കണ്ടെത്തിയത്. സംഭവത്തിൽ ഇതുവരെ ആരെയും അറസ്റ്റ് ചെയ്തിട്ടില്ലെന്നും വിശദമായ അന്വേഷണം തുടരുകയാണെന്നും വിക്ടോറിയ പോലീസ് അറിയിച്ചു.

