ന്യൂഡൽഹി: ഗൂഗിൾ ക്രോം ബ്രൗസർ ഉപയോഗിക്കുന്നവർ ജാഗ്രത പാലിക്കണമെന്ന് കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിന് കീഴിലുള്ള സിഇആർടി-ഇൻ (CERT-In) മുന്നറിയിപ്പ് നൽകി. ക്രോമിലെ ചില സുരക്ഷാ പിഴവുകൾ ഹാക്കർമാർക്ക് നിങ്ങളുടെ കമ്പ്യൂട്ടറിലേക്ക് അതിക്രമിച്ചു കയറാൻ അവസരമൊരുക്കിയേക്കാം എന്നതിനാലാണ് ഈ നിർദ്ദേശം.
ഗൂഗിൾ ക്രോമിലെ ‘ഹൈ റിസ്ക്’ (High Risk) വിഭാഗത്തിൽപ്പെടുന്ന സുരക്ഷാ പിഴവുകളാണ് ഇന്ത്യൻ കമ്പ്യൂട്ടർ എമർജൻസി റെസ്പോൺസ് ടീം (CERT-In) കണ്ടെത്തിയിരിക്കുന്നത്. ഇതുവഴി ഹാക്കർമാർക്ക് ബ്രൗസറിലെ സുരക്ഷാ കവചങ്ങൾ മറികടക്കാനും ഉപയോക്താവിന്റെ സിസ്റ്റത്തിൽ മാൽവെയറുകൾ (Malware) ഇൻസ്റ്റാൾ ചെയ്യാനും സാധിക്കും. വിൻഡോസ് (Windows), മാക് (Mac), ലിനക്സ് (Linux) എന്നീ ഒപ്പറേറ്റിംഗ് സിസ്റ്റങ്ങളിൽ ക്രോമിന്റെ പഴയ പതിപ്പുകൾ ഉപയോഗിക്കുന്നവരെയാണ് ഈ സുരക്ഷാ വീഴ്ച പ്രധാനമായും ബാധിക്കുക.
ഈ ഭീഷണി ഒഴിവാക്കാൻ ഗൂഗിൾ പുറത്തിറക്കിയ ഏറ്റവും പുതിയ സുരക്ഷാ പാച്ചുകൾ അടങ്ങിയ വേർഷനിലേക്ക് ക്രോം ബ്രൗസർ അപ്ഡേറ്റ് ചെയ്യണമെന്ന് സിഇആർടി-ഇൻ നിർദ്ദേശിച്ചു.
