കോഴിക്കോട്: സ്കൂൾ കലോത്സവ വേദിയെയും ഭക്ഷണശാലയെയും അപകീർത്തിപ്പെടുത്താൻ തരംതാണ രാഷ്ട്രീയ നീക്കം നടക്കുന്നതായി പാചക വിദഗ്ധൻ പഴയിടം മോഹനൻ നമ്പൂതിരി. ചൂടുള്ള സാമ്പാറിൽ ജീവനുള്ള പുഴുവിനെ കണ്ടെത്തിയെന്ന് ആരോപിച്ച് ബഹളമുണ്ടാക്കിയ കായികാധ്യാപകനെതിരെ ശക്തമായ നിയമനടപടികളുമായി മുന്നോട്ടുപോകുമെന്നും മാനനഷ്ടത്തിന് കേസെടുക്കുമെന്നും അദ്ദേഹം അറിയിച്ചു.
ഉച്ചഭക്ഷണത്തിന് ശേഷം നാല് കുട്ടികളുമായാണ് കായികാധ്യാപകൻ വീണ്ടും കലോത്സവ ഭക്ഷണശാലയിലെത്തിയത്. ഭക്ഷണം കഴിക്കുന്നതിനിടെ സാമ്പാറിൽ പുഴുവുണ്ടെന്ന് പറഞ്ഞ് ഇയാൾ അനാവശ്യമായി ബഹളമുണ്ടാക്കുകയായിരുന്നു. എന്നാൽ, തിളച്ചുമറിയുന്ന സാമ്പാറിൽ ജീവനുള്ള പുഴുവിനെയാണ് ഇയാൾ കാണിച്ചതെന്ന് അവിടെയുണ്ടായിരുന്നവർ തിരിച്ചറിഞ്ഞു. ഇതോടെ സംഭവം മുൻകൂട്ടി ആസൂത്രണം ചെയ്തതാണെന്ന് വ്യക്തമായതിനെ തുടർന്ന് അവിടെയുണ്ടായിരുന്നവർ അധ്യാപകനെ തടഞ്ഞുവെച്ച് പൊലീസിന് കൈമാറുകയായിരുന്നു.
ഇത്രയും വർഷത്തെ കലോത്സവ പാചക ചരിത്രത്തിൽ ഇത്തരമൊരു അനുഭവം ഇതാദ്യമാണെന്ന് പഴയിടം മോഹനൻ നമ്പൂതിരി വ്യക്തമാക്കി. തനിക്കെതിരെ മനപ്പൂർവ്വം അപവാദം പ്രചരിപ്പിക്കാനും കലോത്സവത്തിന്റെ സൽപ്പേരിന് കളങ്കം വരുത്താനുമുള്ള ബോധപൂർവ്വമായ ശ്രമമാണിതിന് പിന്നിൽ. ഏത് രാഷ്ട്രീയ പാർട്ടിയുടെ പരിപാടിയാണെങ്കിലും നൂറു ശതമാനം ആത്മാർത്ഥതയോടെയാണ് താൻ ജോലി ചെയ്യാറുള്ളത്. തന്റെ അന്തസ്സിനെയും സൽപ്പേരിനെയും ബാധിക്കുന്ന ഇത്തരം വിഷയങ്ങളിൽ ഒട്ടും വിട്ടുവീഴ്ചയില്ലാതെ നിയമപരമായ നടപടികളുമായി മുന്നോട്ടുപോകുമെന്നും അദ്ദേഹം കൂട്ടിച്ചേർത്തു.
