ബ്രിസ്ബേൻ: ബ്രിസ്ബേൻ ഗാലിപ്പോളി ബാരക്സിൽ സഹപ്രവർത്തകന്റെ കഴുത്തറുക്കാൻ ശ്രമിച്ച കേസിൽ അറസ്റ്റിലായ ആർമി പ്രൈവറ്റ് ഷാനൽ ക്രിസ്റ്റിക്ക് കോടതി ജാമ്യം അനുവദിച്ചു. പ്രകോപനമൊന്നുമില്ലാതെ ഒരു കോർപ്പറലിന്റെ കഴുത്തിന് നേരെ അടുക്കളക്കത്തി ഉപയോഗിച്ച് അക്രമം നടത്തിയെന്നാണ് ഇവർക്കെതിരെയുള്ള ആരോപണം. ആക്രമണത്തിൽ പരിക്കേറ്റ സൈനികന് കഴുത്തിൽ അഞ്ച് സെന്റിമീറ്ററോളം ആഴത്തിൽ മുറിവേറ്റിട്ടുണ്ട്.
ഗാലിപ്പോളി ബാരക്സിൽ ജോലിയിൽ പ്രവേശിച്ച് മൂന്നാഴ്ച മാത്രം പിന്നിട്ടപ്പോഴാണ് കോർപ്പറലിന് നേരെ ആക്രമണമുണ്ടായത്. പ്രതിയായ ഷാനൽ ക്രിസ്റ്റിയും പരിക്കേറ്റ സൈനികനും തമ്മിൽ മുൻപരിചയമില്ലെന്നും ആക്രമണം തീർത്തും അപ്രതീക്ഷിതമായിരുന്നുവെന്നും പോലീസ് പറഞ്ഞു. പരിക്കേറ്റ സൈനികനെ ഉടൻ തന്നെ ആശുപത്രിയിൽ പ്രവേശിപ്പിച്ചു. അദ്ദേഹത്തിന്റെ ആരോഗ്യനില നിലവിൽ തൃപ്തികരമാണ്.
ക്രിസ്റ്റിക്ക് മുൻപ് കുറ്റകൃത്യങ്ങളിൽ ഏർപ്പെട്ട ചരിത്രമില്ലാത്തതും മാനസികാരോഗ്യ പ്രശ്നങ്ങൾ റിപ്പോർട്ട് ചെയ്യപ്പെട്ടിട്ടില്ലാത്തതും പരിഗണിച്ചാണ് കോടതി ജാമ്യം അനുവദിച്ചത്. എന്നാൽ പ്രതിയെ കോടതിയിൽ നിന്നും പുറത്തെത്തിച്ച രീതി വലിയ ചർച്ചകൾക്ക് വഴിവെച്ചിട്ടുണ്ട്. സാധാരണ പ്രതികൾ ഉപയോഗിക്കുന്ന വാച്ച് ഹൗസ് കവാടത്തിലൂടെയല്ലാതെ, സൈനിക പോലീസിന്റെ വാഹനത്തിൽ രഹസ്യമായാണ് ഇവരെ കോടതിയിൽ നിന്നും കൊണ്ടുപോയത്.
സംഭവത്തെക്കുറിച്ച് ഗൗരവകരമായ അന്വേഷണം വേണമെന്നും സൈനിക താവളങ്ങളുടെ സുരക്ഷ പുനഃപരിശോധിക്കണമെന്നും സുരക്ഷാ വിദഗ്ധൻ ടോണി ലോഹ്റാൻ പ്രതികരിച്ചു. ക്രിസ്റ്റിയെ ഔദ്യോഗിക പദവികളിൽ നിന്ന് നീക്കം ചെയ്തോ എന്ന കാര്യത്തിൽ പ്രതിരോധ വകുപ്പ് ഇതുവരെ വ്യക്തമായ മറുപടി നൽകിയിട്ടില്ല. എങ്കിലും, ഗാലിപ്പോളി ബാരക്സിലേക്ക് പ്രവേശിക്കുന്നതിൽ നിന്നും ഇവരെ ജാമ്യവ്യവസ്ഥകൾ പ്രകാരം വിലക്കിയിട്ടുണ്ട്.
