ന്യൂഡൽഹി : ഇന്ത്യൻ രാഷ്ട്രീയത്തിലെയും പാർലമെൻ്ററി ചരിത്രത്തിലെയും സുപ്രധാനമായൊരു വഴിത്തിരിവിനാണ് രാജ്യം സാക്ഷ്യം വഹിക്കുന്നത്. ഓൾ ഇന്ത്യ തൃണമൂൽ കോൺഗ്രസ് തങ്ങളുടെ രാജ്യസഭാ സ്ഥാനാർത്ഥികളിലൊരാളായി പ്രമുഖ സുപ്രീം കോടതി അഭിഭാഷകയായ മേനക ഗുരുസ്വാമിയെ പ്രഖ്യാപിച്ചതോടെ, രാജ്യസഭയിലേക്ക് തിരഞ്ഞെടുക്കപ്പെടുന്ന ആദ്യത്തെ LGBTQ+ പ്രതിനിധിയാകാൻ അവർ ഒരുങ്ങുകയാണ്.
സുപ്രീം കോടതിയിലെ സീനിയർ അഭിഭാഷകയായ മേനക ഗുരുസ്വാമി, ഇന്ത്യയിലെ LGBTQ+ അവകാശ പോരാട്ടങ്ങളിൽ നിർണ്ണായക പങ്ക് വഹിച്ച വ്യക്തിയാണ്. 2018-ൽ ഇന്ത്യൻ ശിക്ഷാ നിയമത്തിലെ 377-ാം വകുപ്പ് റദ്ദാക്കുന്നതിലേക്ക് നയിച്ച ചരിത്രപരമായ നിയമപോരാട്ടത്തിൽ അവർ മുഖ്യ പങ്ക് വഹിച്ചിരുന്നു. വ്യക്തിസ്വാതന്ത്ര്യത്തിനും അന്തസ്സിനും വേണ്ടിയുള്ള ആ പോരാട്ടം ഇന്ത്യയിലെ LGBTQ+ പ്രസ്ഥാനത്തിൻ്റെ സുപ്രധാന നാഴികക്കല്ലായിരുന്നു.
