കണ്ണൂർ: കണ്ണൂർ കോർപ്പറേഷൻ ഓഫീസിന് മുന്നിൽ ഭരണ-പ്രതിപക്ഷ കൗൺസിലർമാർ തമ്മിൽ രൂക്ഷമായ സംഘർഷം. മേയർ മുസമ്മിൽ ഹാജിയെ പ്രതിപക്ഷ കൗൺസിലർമാർ കൈയേറ്റം ചെയ്തുവെന്ന ആരോപണത്തിന് പിന്നാലെയാണ് സ്ഥിതിഗതികൾ വഷളായത്. “ആരാടാ മേയറെ തല്ലിയത്, അവനെ വെറുതെ വിടരുത്” എന്ന ആക്രോശവുമായി ഭരണപക്ഷ അനുകൂലികൾ സംഘടിച്ചതോടെ ഓഫീസ് പരിസരം സംഘർഷഭരിതമായി.
നികുതി വർദ്ധനവിനെതിരെ പ്രതിപക്ഷം ഓഫീസിനുള്ളിൽ നടത്തിയ പ്രതിഷേധമാണ് വാക്കേറ്റത്തിലും പിന്നീട് കൈയാങ്കളിയിലും കലാശിച്ചത്. മേയറെ തടഞ്ഞുവെച്ച പ്രതിപക്ഷ അംഗങ്ങൾ അദ്ദേഹത്തെ ശാരീരികമായി ഉപദ്രവിച്ചുവെന്ന് ഭരണപക്ഷം ആരോപിച്ചു. ഇതിന് പിന്നാലെ ഇരുവിഭാഗം പ്രവർത്തകരും കോർപ്പറേഷൻ കവാടത്തിന് മുന്നിൽ തടിച്ചുകൂടുകയും പരസ്പരം ഏറ്റുമുട്ടുകയും ചെയ്തു.
പോലീസ് സ്ഥലത്തെത്തി ലാത്തിവീശിയാണ് പ്രവർത്തകരെ പിരിച്ചുവിട്ടത്. സംഘർഷത്തിൽ ഏതാനും കൗൺസിലർമാർക്കും പ്രവർത്തകർക്കും പരിക്കേറ്റിട്ടുണ്ട്. മേയറെ കൈയേറ്റം ചെയ്ത നടപടിയിൽ പ്രതിഷേധിച്ച് ഭരണപക്ഷം നഗരത്തിൽ പ്രതിഷേധ പ്രകടനം നടത്തി. എന്നാൽ ആരോപണം അടിസ്ഥാനരഹിതമാണെന്നും സമാധാനപരമായി പ്രതിഷേധിച്ച തങ്ങളെ പോലീസ് സഹായത്തോടെ മർദ്ദിക്കുകയായിരുന്നുവെന്നുമാണ് പ്രതിപക്ഷത്തിന്റെ വാദം. സംഭവത്തെത്തുടർന്ന് കോർപ്പറേഷൻ ഓഫീസിന് മുന്നിൽ കനത്ത പോലീസ് കാവൽ ഏർപ്പെടുത്തിയിട്ടുണ്ട്
