സിഡ്നി: ഈസ്റ്റർ വാരാന്ത്യത്തോടനുബന്ധിച്ചുള്ള നീണ്ട അവധിക്കായി ഓസ്ട്രേലിയ ഒരുങ്ങുന്നു. രാജ്യത്തെ എല്ലാ സംസ്ഥാനങ്ങളിലും ടെറിട്ടറികളിലും ‘ഗുഡ് ഫ്രൈഡേ’ (ദുഃഖവെള്ളി), ‘ഈസ്റ്റർ മൺഡേ’ എന്നിവ പൊതു അവധിയായി അംഗീകരിച്ചിട്ടുണ്ടെങ്കിലും, ശനി, ഞായർ ദിവസങ്ങളിലെ അവധി സംബന്ധിച്ച് വിവിധ ഇടങ്ങളിൽ വ്യത്യസ്ത നിയമങ്ങളാണ് നിലവിലുള്ളത്.
ഭൂരിഭാഗം സംസ്ഥാനങ്ങളും ശനിയാഴ്ച പൊതു അവധിയായി കണക്കാക്കുന്നുണ്ടെങ്കിലും ടാസ്മാനിയ, വെസ്റ്റേൺ ഓസ്ട്രേലിയ എന്നീ സംസ്ഥാനങ്ങളിൽ ഈ ദിവസം പൊതു അവധിയില്ല. ഇത് ഈ മേഖലകളിലെ റീട്ടെയിൽ, ഹോസ്പിറ്റാലിറ്റി ജീവനക്കാർക്ക് പബ്ലിക് ഹോളിഡേ ബോണസ് ലഭിക്കുന്നതിന് തടസ്സമാകും. ന്യൂ സൗത്ത് വെയ്ൽസ്, വിക്ടോറിയ, ക്വീൻസ്ലൻഡ്, സൗത്ത് ഓസ്ട്രേലിയ, എ.സി.ടി, നോർത്തേൺ ടെറിട്ടറി എന്നിവിടങ്ങളിൽ ശനിയാഴ്ച അവധിയായിരിക്കും.
ടാസ്മാനിയ ഒഴികെയുള്ള എല്ലാ സംസ്ഥാനങ്ങളും ഈസ്റ്റർ ഞായറാഴ്ച പൊതു അവധിയായി അംഗീകരിച്ചിട്ടുണ്ട്. ടാസ്മാനിയയിൽ ഞായറാഴ്ചയ്ക്ക് പകരം ഈസ്റ്റർ മൺഡേ കഴിഞ്ഞുവരുന്ന ചൊവ്വാഴ്ചയാണ് (Easter Tuesday) അവധി നൽകുന്നത്. എന്നാൽ ഇത് പ്രധാനമായും സർക്കാർ ജീവനക്കാർക്ക് മാത്രമാണ് ബാധകമാകുന്നത്.
ഈ വർഷത്തെ ഈസ്റ്റർ ഞായറാഴ്ച (ഏപ്രിൽ 5) തന്നെയാണ് ‘ഡേലൈറ്റ് സേവിങ്’ അവസാനിക്കുന്നത് എന്ന പ്രത്യേകതയുമുണ്ട്. അന്ന് പുലർച്ചെ 3 മണിക്ക് ക്ലോക്കുകൾ ഒരു മണിക്കൂർ പിന്നോട്ട് തിരിച്ച് 2 മണിയാക്കി മാറ്റണം. എൻ.എസ്.ഡബ്ല്യു, വിക്ടോറിയ, സൗത്ത് ഓസ്ട്രേലിയ, ടാസ്മാനിയ, എ.സി.ടി എന്നിവിടങ്ങളിലെ താമസക്കാർക്ക് ഇതോടെ ഒരു മണിക്കൂർ അധിക ഉറക്കം ലഭിക്കും. എന്നാൽ ക്വീൻസ്ലൻഡ്, വെസ്റ്റേൺ ഓസ്ട്രേലിയ, നോർത്തേൺ ടെറിട്ടറി എന്നിവിടങ്ങളിൽ സമയമാറ്റം ഉണ്ടാകില്ല.
ഇൻഫ്ലുവൻസ വ്യാപനവും മറ്റും കണക്കിലെടുത്ത് ഈ അവധിക്കാലത്ത് ജനങ്ങൾ ജാഗ്രത പാലിക്കണമെന്നും അധികൃതർ ഓർമ്മിപ്പിച്ചു. വാപിംഗ് (Vaping) ക്യാൻസറിന് കാരണമായേക്കാമെന്ന പുതിയ പഠന റിപ്പോർട്ടുകളും ഇതോടൊപ്പം പുറത്തുവന്നിട്ടുണ്ട്.
