ടെഹ്റാൻ: അമേരിക്കയുടെ അത്യാധുനിക നിരീക്ഷണ ഡ്രോണായ MQ-9 റീപ്പർ (MQ-9 Reaper) വെടിവെച്ചിട്ടതായി ഇറാൻ അവകാശപ്പെട്ടു. പടിഞ്ഞാറൻ ഇറാനിലെ ഒരു നഗരത്തിന് സമീപം തങ്ങളുടെ വ്യോമപ്രതിരോധ സംവിധാനങ്ങൾ ഡ്രോണിനെ തകർക്കുകയായിരുന്നുവെന്ന് ഇറാനിയൻ മാധ്യമങ്ങൾ റിപ്പോർട്ട് ചെയ്തു. തകർന്ന ഡ്രോണിന്റെ അവശിഷ്ടങ്ങളുടെ ചിത്രങ്ങളും വീഡിയോകളും ഇറാൻ ഔദ്യോഗികമായി പുറത്തുവിട്ടിട്ടുണ്ട്.തുടർച്ചയായി 27 മണിക്കൂറിലധികം പറക്കാൻ ശേഷിയുള്ളതും ഹെൽഫയർ മിസൈലുകൾ വഹിക്കാൻ കഴിയുന്നതുമായ ഡ്രോണാണിത്. പടിഞ്ഞാറൻ ഇറാനിലെ ആകാശസീമയിൽ അതിക്രമിച്ചു കയറിയതിനാലാണ് ഡ്രോൺ തകർത്തതെന്നാണ് ഇറാന്റെ വാദം.അതേസമയം, അമേരിക്കൻ പ്രതിരോധ ആസ്ഥാനമായ പെന്റഗണോ യുഎസ് സെൻട്രൽ കമാൻഡോ ഈ സംഭവത്തിൽ ഔദ്യോഗിക പ്രതികരണം നടത്തിയിട്ടില്ല. കഴിഞ്ഞ ഏതാനും മാസങ്ങളായി ഇറാനും അമേരിക്കയും തമ്മിലുള്ള ബന്ധം വഷളായിരിക്കുന്ന സാഹചര്യത്തിലാണ് ഈ പുതിയ പ്രകോപനം ഉണ്ടായിരിക്കുന്നത്.നേരത്തെ യമനിലെ ഹൂതി വിമതർ അമേരിക്കയുടെ MQ-9 ഡ്രോണുകൾ വെടിവെച്ചിട്ടിട്ടുണ്ടെങ്കിലും, ഇറാൻ നേരിട്ട് ഈ ഡ്രോൺ തകർക്കുന്നത് നിലവിലെ സാഹചര്യത്തിൽ വലിയ പ്രത്യാഘാതങ്ങൾ ഉണ്ടാക്കിയേക്കാം. മൂന്ന് ബില്യൺ ഡോളറിന്റെ പാക്കേജിൽ ഇന്ത്യയും ഈ ഡ്രോണുകൾ അമേരിക്കയിൽ നിന്ന് വാങ്ങാൻ പദ്ധതിയിട്ടിരുന്നു. അതുകൊണ്ട് തന്നെ ഇത്തരം അത്യാധുനിക ഡ്രോണുകളുടെ സുരക്ഷയെക്കുറിച്ചുള്ള ചർച്ചകൾക്കും ഈ സംഭവം വഴിവെച്ചിട്ടുണ്ട്.
അമേരിക്കയുടെ അത്യാധുനിക MQ-9 റീപ്പർ ഡ്രോൺ വെടിവെച്ചിട്ടതായി ഇറാൻ; തെളിവുകൾ പുറത്തുവിട്ടു
