സിഡ്നി: സിഡ്നി മലയാളി സമൂഹത്തിലെ സജീവ സാന്നിധ്യവും ബെഥേൽ മാർത്തോമാ ചർച്ചിന്റെ (BMTC) സ്ഥാപക നേതാക്കളിൽ ഒരാളുമായ ജോയ് വി. ജേക്കബ് (ജോയ്ച്ചൻ) അന്തരിച്ചു. സിഡ്നിയിലെ ആർ.പി.എ (RPA) ഹോസ്പിറ്റലിൽ ചികിത്സയിലായിരിക്കെ ഏപ്രിൽ 9-ന് രാത്രി 9:30-ഓടെയായിരുന്നു അന്ത്യം.
സിഡ്നിയിലെ ആദ്യകാല മലയാളികളിൽ ഒരാളായ അദ്ദേഹം, പ്രവാസി കൂട്ടായ്മകളുടെയും സഭയുടെയും വളർച്ചയിൽ നിർണ്ണായക പങ്ക് വഹിച്ച വ്യക്തിയാണ്. പ്രത്യേകിച്ച് ബെഥേൽ മാർത്തോമാ ചർച്ചിന്റെ രൂപീകരണ ഘട്ടം മുതൽ അതിന്റെ പടിപടിയായുള്ള വികാസത്തിൽ അദ്ദേഹം നൽകിയ നേതൃത്വം മലയാളി സമൂഹം നന്ദിയോടെ സ്മരിക്കുന്നു. സഭയിലെ വിവിധ കമ്മിറ്റികളിലും സമുദായ പ്രവർത്തനങ്ങളിലും അദ്ദേഹം മുൻനിരയിൽ ഉണ്ടായിരുന്നു.
ജോയ് വി. ജേക്കബിന്റെ നിര്യാണത്തിൽ ബെഥേൽ മാർത്തോമാ ചർച്ച് വികാരിയും ഭരണസമിതിയും ആഴത്തിലുള്ള ദുഃഖം രേഖപ്പെടുത്തുകയും ആദരാഞ്ജലികൾ അർപ്പിക്കുകയും ചെയ്തു. അദ്ദേഹത്തിന്റെ വേർപാട് സിഡ്നിയിലെ മലയാളി സമൂഹത്തിന് വലിയൊരു നഷ്ടമാണെന്ന് മെട്രോ മലയാളം അനുശോചന സന്ദേശത്തിൽ അറിയിച്ചു. സംസ്കാര ചടങ്ങുകളെ സംബന്ധിച്ച കൂടുതൽ വിവരങ്ങൾ കുടുംബാംഗങ്ങൾ പിന്നീട് അറിയിക്കുന്നതാണ്.
