ബ്രിസ്ബേൻ: ക്വീൻസ്ലൻഡിന്റെ വടക്കൻ മേഖലകളിൽ കനത്ത മഴയ്ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രം. പസഫിക് സമുദ്രത്തിൽ രൂപം കൊണ്ട് കടുത്ത നാശം വിതച്ച ‘മൈല’ (Maila) ചുഴലിക്കാറ്റിന്റെ അവശേഷിപ്പുകളാണ് ഇപ്പോൾ വടക്കൻ ക്വീൻസ്ലൻഡ് തീരത്തേക്ക് നീങ്ങുന്നത്. സോളമൻ ദ്വീപുകൾക്ക് സമീപം രൂപം പ്രാപിച്ച് കാറ്റഗറി 5 ചുഴലിക്കാറ്റായി മാറിയ മൈല, നിലവിൽ ശക്തി കുറഞ്ഞ് തീവ്രന്യൂനമർദ്ദമായി മാറിയെങ്കിലും വടക്കൻ തീരങ്ങളിൽ വരും ദിവസങ്ങളിൽ ശക്തമായ മഴയ്ക്ക് കാരണമാകുമെന്ന് വെതർസോൺ അറിയിച്ചു.
ഇന്ന് രാത്രിയോടെ ഈ ന്യൂനമർദ്ദം കേപ് യോർക്ക് തീരം തൊടുമെന്നാണ് പ്രതീക്ഷിക്കുന്നത്. മക്കായ് മുതൽ കേപ് യോർക്ക് വരെയുള്ള തീരദേശ മേഖലകളിൽ കനത്ത മഴ ലഭിക്കും. ചിലയിടങ്ങളിൽ 100 മില്ലീമീറ്ററിൽ കൂടുതൽ മഴ ലഭിക്കാൻ സാധ്യതയുള്ളതിനാൽ ടൗൺസ്വിൽ ഉൾപ്പെടെയുള്ള നഗരങ്ങൾ അതീവ ജാഗ്രതയിലാണ്. സാധാരണയായി ഏപ്രിൽ മാസത്തിൽ വരണ്ട കാലാവസ്ഥ അനുഭവപ്പെടാറുള്ള ഈ മേഖലകളിൽ ഇത്തവണ ചുരുങ്ങിയ ദിവസങ്ങൾക്കുള്ളിൽ തന്നെ വലിയ അളവിൽ മഴ ലഭിക്കുമെന്നാണ് റിപ്പോർട്ട്.
മഴ കനക്കുന്നത് കായിക പ്രേമികളെയും ആശങ്കയിലാഴ്ത്തിയിട്ടുണ്ട്. വ്യാഴാഴ്ച രാത്രി ടൗൺസ്വില്ലിലെ ക്വീൻസ്ലൻഡ് കൺട്രി ബാങ്ക് സ്റ്റേഡിയത്തിൽ നടക്കുന്ന എൻ.ആർ.എൽ (NRL) മത്സരത്തിൽ നോർത്ത് ക്വീൻസ്ലൻഡ് കൗബോയ്സും മാൻലി സീ ഈഗിൾസും തമ്മിലാണ് ഏറ്റുമുട്ടുന്നത്. മഴ പെയ്യാൻ സാധ്യതയുള്ളതിനാൽ മത്സരം നനഞ്ഞ പിച്ചിലായിരിക്കും നടക്കുക.
വടക്കൻ മേഖലകളിൽ മഴ പെയ്യുമ്പോൾ സംസ്ഥാനത്തിന്റെ ഉൾപ്രദേശങ്ങളായ ലോംഗ് റീച്ച്, മൗണ്ട് ഈസ, വിന്റൺ എന്നിവിടങ്ങളിലും ഭേദപ്പെട്ട മഴ ലഭിക്കുമെന്നാണ് പ്രവചനം. ഉൾനാടൻ മേഖലകളിൽ ഇത്തവണ പ്രതീക്ഷിച്ചതിലും കൂടുതൽ മഴ ലഭിച്ചതായും കാലാവസ്ഥാ നിരീക്ഷകർ ചൂണ്ടിക്കാട്ടുന്നു. എന്നാൽ തെക്കുകിഴക്കൻ ക്വീൻസ്ലൻഡിൽ മഴയ്ക്കുള്ള സാധ്യത കുറവാണ്. ഈ വർഷം മഴ ലഭിക്കാൻ ഏറെ കാത്തിരിക്കുന്ന ബ്രിസ്ബേൻ ഉൾപ്പെടെയുള്ള തെക്കൻ നഗരങ്ങളിൽ വരും ദിവസങ്ങളിലും തെളിഞ്ഞ കാലാവസ്ഥ തുടരാനാണ് സാധ്യത.
