വിരുദുനഗർ: തമിഴ്നാട്ടിലെ വിരുദുനഗർ ജില്ലയിലുണ്ടായ അതിശക്തമായ പടക്കശാല സ്ഫോടനത്തിൽ 19 തൊഴിലാളികൾ കൊല്ലപ്പെട്ടു. ജില്ലയിലെ വെമ്പക്കോട്ടൈ മേഖലയിലുള്ള പടക്ക നിർമ്മാണ ശാലയിലാണ് ശനിയാഴ്ച ഉച്ചയോടെ അപകടം നടന്നത്. മരിച്ചവരിൽ സ്ത്രീകളും ഉൾപ്പെടുന്നുണ്ടെന്നാണ് പ്രാഥമിക വിവരം.പടക്കങ്ങൾ നിർമ്മിക്കുന്നതിനിടെ മരുന്നുകൾക്ക് തീപിടിക്കുകയും തുടർന്ന് വലിയ ശബ്ദത്തോടെ പൊട്ടിത്തെറിക്കുകയുമായിരുന്നു. സ്ഫോടനത്തിന്റെ ആഘാതത്തിൽ പടക്കശാല പൂർണ്ണമായും തകരുകയും സമീപത്തെ കെട്ടിടങ്ങൾക്ക് കേടുപാടുകൾ സംഭവിക്കുകയും ചെയ്തു. പരിക്കേറ്റ മുപ്പതോളം പേരെ സമീപത്തെ ആശുപത്രികളിൽ പ്രവേശിപ്പിച്ചു. ഇതിൽ ചിലരുടെ നില അതീവ ഗുരുതരമാണ്.അഗ്നിശമന സേനയുടെ യൂണിറ്റുകൾ സ്ഥലത്തെത്തിയാണ് തീ നിയന്ത്രണവിധേയമാക്കിയത്. അപകടത്തിൽ മരിച്ചവരുടെ കുടുംബങ്ങൾക്ക് തമിഴ്നാട് മുഖ്യമന്ത്രി എം.കെ. സ്റ്റാലിൻ അനുശോചനം അറിയിക്കുകയും ധനസഹായം പ്രഖ്യാപിക്കുകയും ചെയ്തു. സ്ഫോടനത്തെക്കുറിച്ച് അന്വേഷിക്കാൻ ജില്ലാ ഭരണകൂടം ഉത്തരവിട്ടിട്ടുണ്ട്. നിയമവിരുദ്ധമായി സ്ഫോടകവസ്തുക്കൾ സൂക്ഷിച്ചിരുന്നോ എന്നതടക്കമുള്ള കാര്യങ്ങൾ പോലീസ് പരിശോധിച്ചു വരികയാണ്. മേഖലയിൽ സുരക്ഷാ പരിശോധനകൾ കർശനമാക്കാൻ അധികൃതർ നിർദ്ദേശം നൽകി.
തമിഴ്നാട്ടിൽ പടക്ക നിർമ്മാണ ശാലയിൽ വൻ സ്ഫോടനം; 19 മരണം, നിരവധി പേർക്ക് പരിക്ക്
