സിഡ്നി: നഗരത്തിന്റെ കിഴക്കൻ മേഖലയിൽ ഓടിക്കൊണ്ടിരുന്ന ബസ്സിന്റെ മേൽക്കൂരയിൽ കിടന്ന് യാത്ര ചെയ്ത രണ്ട് ആൺകുട്ടികൾക്കായി പോലീസ് അന്വേഷണം ഊർജിതമാക്കി. ഇന്നലെ രാവിലെ 11.40-ന് ഈസ്റ്റ്ഗാർഡനിൽ നിന്ന് ബോണ്ടായ് ജംഗ്ഷനിലേക്ക് സർവീസ് നടത്തിയ 356-ാം നമ്പർ ബസ്സിന് മുകളിലായിരുന്നു കൗമാരക്കാരുടെ ഈ അപകടയാത്ര.
ബസ്സിന്റെ മുകളിലെ എമർജൻസി എക്സിറ്റ് ഹാച്ചിന് സമീപം ഇവർ കിടക്കുന്ന ദൃശ്യങ്ങൾ പുറത്തുവന്നിട്ടുണ്ട്. ക്വീൻസ് പാർക്കിൽ വച്ച് ഡ്രൈവർ ബസ് നിർത്തിയതോടെ ഇരുവരും വേഗത്തിൽ ഇറങ്ങിയോടി. ‘ബസ് സർഫിംഗ്’ എന്ന് അറിയപ്പെടുന്ന ഈ പ്രവണത സോഷ്യൽ മീഡിയയിലൂടെ പ്രചാരത്തിലായ ഒന്നാണ്. എന്നാൽ ഇത് അങ്ങേയറ്റം അപകടകരവും നിയമവിരുദ്ധവുമാണെന്ന് ഗതാഗത വകുപ്പ് അധികൃതർ മുന്നറിയിപ്പ് നൽകി.
ഇത്തരം പ്രവർത്തനങ്ങൾ ഒരു തരത്തിലും നിസ്സാരമായി കാണാനാവില്ലെന്നും ഇത് യാത്രക്കാരുടെ ജീവൻ അപകടത്തിലാക്കുന്നതിനൊപ്പം ഗതാഗത സംവിധാനത്തെ തടസ്സപ്പെടുത്തുന്നുവെന്നും ട്രാൻസ്പോർട്ട് ഫോർ എൻ.എസ്.ഡബ്ല്യു കോർഡിനേറ്റർ ജനറൽ ഹോവാർഡ് കോളിൻസ് പറഞ്ഞു. കൗമാരക്കാരുടെ ഈ അശ്രദ്ധമായ പെരുമാറ്റത്തെ അദ്ദേഹം ശക്തമായി അപലപിച്ചു. ഇത്തരം പ്രവണതകൾ തടയാൻ പോലീസുമായി ചേർന്ന് കർശന നടപടികൾ സ്വീകരിക്കുമെന്നും അദ്ദേഹം വ്യക്തമാക്കി.
ബസ്സിന് മുകളിൽ യാത്ര ചെയ്യുന്നത് വൈദ്യുത ലൈനുകളിലോ പാലങ്ങളിലോ തട്ടി ദാരുണമായ മരണത്തിന് വരെ കാരണമായേക്കാമെന്നും, ഇത്തരക്കാർ എടുക്കുന്ന അവസാനത്തെ തീരുമാനമായി ഇത് മാറിയേക്കാം എന്നും അധികൃതർ ഗൗരവകരമായ മുന്നറിയിപ്പ് നൽകി. സംഭവത്തിൽ ഉൾപ്പെട്ടവരെ കണ്ടെത്താനുള്ള ശ്രമങ്ങൾ പോലീസ് തുടരുകയാണ്
