ടെഹ്റാൻ: നിലവിലെ യുദ്ധം അവസാനിച്ചശേഷം മാത്രമേ ആണവ വിഷയത്തിൽ ചർച്ചകൾ നടത്തുകയുള്ളുവെന്ന് ഇറാൻ വ്യക്തമാക്കി. സമാധാനത്തിനുള്ള പുതിയ നിർദ്ദേശത്തിന്റെ ഭാഗമായാണ് ഈ നിലപാട് മുന്നോട്ടുവെച്ചത്
ഇറാൻ നൽകിയ നിർദേശത്തിൽ, യുദ്ധം അവസാനിപ്പിക്കുന്നതും മേഖലയിൽ ഉണ്ടായിരിക്കുന്ന സംഘർഷങ്ങൾ കുറയ്ക്കുന്നതും മുൻഗണനയായി പരിഗണിക്കണമെന്നും, അതിനു ശേഷമാണ് ആണവ ചർച്ചകൾക്ക് തയ്യാറാകുകയെന്നും വ്യക്തമാക്കിയിട്ടുണ്ട്.എന്നാൽ ഈ നിലപാടിൽ അമേരിക്കൻ പ്രസിഡന്റ് ഡോണൾഡ് ട്രംപ് അനിഷ്ടം പ്രകടിപ്പിച്ചതായി അമേരിക്കൻ ഉദ്യോഗസ്ഥർ അറിയിച്ചു. ആണവ വിഷയത്തെ പിന്നീട് പരിഗണിക്കണമെന്ന ഇറാന്റെ നിർദേശം അമേരിക്കയുടെ നിലപാടിനോട് പൊരുത്തപ്പെടുന്നില്ലെന്നാണ് റിപ്പോർട്ടുകൾ.
അമേരിക്കയുടെ നിലപാട്, ഇറാന്റെ ആണവ പദ്ധതി ഉടൻ തന്നെ ചർച്ചയിൽ ഉൾപ്പെടുത്തണമെന്നതാണ്. യുദ്ധാവസ്ഥ തുടരുന്നതിനിടയിലും ആണവ വിഷയത്തിൽ വ്യക്തമായ ഉറപ്പ് ലഭിക്കേണ്ടതുണ്ടെന്നാണ് വാഷിംഗ്ടൺ വ്യക്തമാക്കുന്നത്.
ഇറാനും അമേരിക്കയും തമ്മിലുള്ള സമാധാനശ്രമങ്ങൾ തുടരുന്നതിനിടെ ഈ അഭിപ്രായവ്യത്യാസം ചര്ച്ചകൾക്ക് തിരിച്ചടിയായിരിക്കുകയാണ്. ഇടനിലക്കാരുടെ ശ്രമങ്ങൾ തുടരുന്നുവെങ്കിലും നിലവിൽ ധാരണയിലെത്താനുള്ള സാധ്യത കുറവാണെന്നാണ് വിലയിരുത്തൽ.
മധ്യപൂർവ്വേഷ്യയിൽ തുടരുന്ന സംഘർഷവും ഹോർമുസ് കടലിടുക്കുമായി ബന്ധപ്പെട്ട പ്രശ്നങ്ങളും ആഗോള തലത്തിൽ സാമ്പത്തിക പ്രത്യാഘാതങ്ങൾ ഉണ്ടാക്കുന്ന സാഹചര്യത്തിലാണ് ഈ നീക്കങ്ങൾ ശ്രദ്ധ നേടുന്നത്.
