ചണ്ഡീഗഢ്: പഞ്ചാബിലെ പട്ടിയാല ജില്ലയിൽ റെയിൽപാളത്തിൽ ഉണ്ടായ സ്ഫോടനവുമായി ബന്ധപ്പെട്ട് ഖാലിസ്ഥാൻ അനുകൂല ഭീകരസംഘവുമായി ബന്ധമുള്ള നാല് പേരെ പൊലീസ് അറസ്റ്റ് ചെയ്തു. സ്ഫോടനത്തിന് പിന്നാലെ നടത്തിയ അതിവേഗ അന്വേഷണത്തിലാണ് ഭീകരർ പിടിയിലായത്.
രാജ്പുര–ശംഭു മേഖലക്ക് സമീപമുള്ള റെയിൽപാതയിലാണ് സ്ഫോടനം ഉണ്ടായത്. പാളത്തിൽ സ്ഥാപിച്ച ഇംപ്രൊവൈസ്ഡ് എക്സ്പ്ലോസീവ് ഡിവൈസ് (IED) നേരത്തെ പൊട്ടിത്തെറിച്ചതിനാൽ വലിയ ദുരന്തം ഒഴിവായതായി പൊലീസ് വ്യക്തമാക്കി. സംഭവത്തിൽ പാളത്തിന് കേടുപാടുകൾ സംഭവിച്ചെങ്കിലും വലിയ അപകടം ഉണ്ടായില്ല.
സ്ഫോടനം നടത്തുന്നതിനിടെ ഭീകരരിൽ ഒരാൾ കൊല്ലപ്പെട്ടതായും തിരിച്ചറിഞ്ഞിട്ടുണ്ട്. ഇയാൾ ഉൾപ്പെട്ട സംഘമാണ് പാളം തകർക്കാൻ ശ്രമിച്ചതെന്നാണ് അന്വേഷണത്തിൽ കണ്ടെത്തിയത്.
അറസ്റ്റിലായ നാലുപേരും ‘ഹൈലി റാഡിക്കലൈസ്ഡ്’ വ്യക്തികളാണെന്ന് പൊലീസ് അറിയിച്ചു. ഇവർ പൊതുമേഖലാ അടിസ്ഥാനസൗകര്യങ്ങളെ ലക്ഷ്യമിട്ട് കൂടുതൽ ആക്രമണങ്ങൾ ആസൂത്രണം ചെയ്തിരുന്നതായും അന്വേഷണത്തിൽ കണ്ടെത്തി. വലിയ തോതിൽ ആയുധങ്ങളും സ്ഫോടക വസ്തുക്കളും പിടിച്ചെടുത്തിട്ടുണ്ട്.
സംഘത്തിന് വിദേശ ബന്ധങ്ങളുണ്ടെന്നും പാകിസ്താനുമായി ബന്ധപ്പെട്ട ആയുധ വിതരണ ശൃംഖലയുമായി ബന്ധമുണ്ടെന്നുമാണ് പ്രാഥമിക കണ്ടെത്തൽ. സംഭവത്തെ തുടർന്ന് സംസ്ഥാനത്ത് സുരക്ഷ ശക്തമാക്കി. റെയിൽപാതകൾ ഉൾപ്പെടെ പ്രധാന അടിസ്ഥാനസൗകര്യങ്ങളെ ലക്ഷ്യമിട്ട് ആക്രമണശ്രമങ്ങൾ വർധിക്കുന്ന പശ്ചാത്തലത്തിൽ സംഭവം ഗൗരവകരമായി കണക്കാക്കപ്പെടുന്നു.
