സിഡ്നി: മാധ്യമ സ്ഥാപനങ്ങളുടെ വാർത്തകൾ ഉപയോഗിക്കുന്നതിന് ഗൂഗിൾ, മെറ്റ തുടങ്ങിയ വൻകിട ടെക് കമ്പനികൾ പണം നൽകണമെന്ന ഓസ്ട്രേലിയൻ സർക്കാരിന്റെ നീക്കത്തിനെതിരെ രൂക്ഷവിമർശനവുമായി യുഎസ് പ്രസിഡന്റ് ഡൊണാൾഡ് ട്രംപ്. ഓസ്ട്രേലിയയുടെ ഈ നടപടിയെ ‘വിദേശ ചൂഷണം’ (Foreign Extortion) എന്നാണ് ട്രംപ് ഭരണകൂടം വിശേഷിപ്പിച്ചത്. എന്നാൽ, മാധ്യമപ്രവർത്തകരുടെ കഠിനാധ്വാനത്തിന് അർഹമായ മൂല്യം നൽകാനാണ് തങ്ങൾ ശ്രമിക്കുന്നതെന്ന് ഓസ്ട്രേലിയൻ പ്രധാനമന്ത്രി ആന്തണി ആൽബനീസ് മറുപടി നൽകി.
വാർത്താ സ്ഥാപനങ്ങളുമായി കരാറുകളിൽ ഏർപ്പെടാത്ത ടെക് കമ്പനികൾക്ക് അവയുടെ വരുമാനത്തിന്റെ 2.25 ശതമാനം ലെവി ചുമത്താനാണ് ഓസ്ട്രേലിയൻ ലേബർ പാർട്ടിയുടെ പദ്ധതി. ഇതിനെതിരെയാണ് അമേരിക്ക രംഗത്തെത്തിയിരിക്കുന്നത്. അമേരിക്കൻ കമ്പനികളെ ഡിജിറ്റൽ നികുതികളിലൂടെയും മറ്റും ചൂഷണം ചെയ്യുന്നതിൽ നിന്നും സംരക്ഷിക്കാൻ ട്രംപ് പ്രതിജ്ഞാബദ്ധനാണെന്ന് ട്രംപ് ഭരണകൂട വക്താവ് കുഷ് ദേശായി വ്യക്തമാക്കി. ഇതിനെതിരെ വ്യാപാര ഉപരോധങ്ങൾ ഉൾപ്പെടെയുള്ള നടപടികൾ സ്വീകരിക്കാൻ വൈറ്റ് ഹൗസിനോട് ടെക് വ്യവസായ ഗ്രൂപ്പുകൾ ആവശ്യപ്പെട്ടിട്ടുണ്ട്.
വാർത്തകൾ നിർമ്മിക്കുന്നത് മാധ്യമ സ്ഥാപനങ്ങളുടെ ബൗദ്ധിക സ്വത്താണെന്നും മറ്റൊരാളുടെ കഠിനാധ്വാനത്തിലൂടെ ടെക് കമ്പനികൾ ലാഭം ഉണ്ടാക്കുമ്പോൾ അതിന് പണം നൽകണമെന്നത് ന്യായമായ കാര്യമാണെന്നും ആന്തണി ആൽബനീസ് പറഞ്ഞു. ഇതിലൂടെ സർക്കാരിന് വരുമാനമുണ്ടാക്കാൻ താല്പര്യമില്ലെന്നും കമ്പനികൾ മാധ്യമങ്ങളുമായി നേരിട്ട് കരാറിൽ ഏർപ്പെടണമെന്നാണ് ആഗ്രഹമെന്നും അദ്ദേഹം വ്യക്തമാക്കി. സർക്കാരിന്റെ ഈ നീക്കത്തിന് പ്രതിപക്ഷമായ കോളിഷന്റെയും ഗ്രീൻസ് പാർട്ടിയുടെയും പിന്തുണ ലഭിക്കാൻ സാധ്യതയുണ്ട്. വൻകിട കമ്പനികൾ വാർത്താ സേവനങ്ങളിലേക്ക് തുക നൽകണമെന്നാണ് നാഷണൽസ് നേതാവ് മാറ്റ് കാനവൻ പറഞ്ഞത്. എന്നാൽ ഈ പണം ചെറുകിട പ്രാദേശിക പത്രങ്ങൾക്ക് ലഭിക്കുന്നുണ്ടെന്ന് ഉറപ്പാക്കണമെന്ന് ഗ്രീൻസ് വക്താവ് സാറ ഹാൻസൺ യംഗ് ആവശ്യപ്പെട്ടു.
ഓസ്ട്രേലിയയുടെ നിർദ്ദേശം വിവേചനപരമാണെന്ന് ഗൂഗിളും മെറ്റയും ആരോപിച്ചു. ഈ നിയമം ഇന്റർനെറ്റിന്റെ തുറന്ന സ്വഭാവത്തെ തകർക്കുന്നതാണെന്നാണ് ഇവരുടെ വാദം. ഓസ്ട്രേലിയയും അമേരിക്കയും തമ്മിലുള്ള വ്യാപാര ബന്ധത്തെപ്പോലും ബാധിച്ചേക്കാവുന്ന ഒരു വലിയ തർക്കത്തിലേക്കാണ് ഈ വിഷയം നീങ്ങുന്നത്. ടെക് കമ്പനികളുടെ മേൽ നിയന്ത്രണം കൊണ്ടുവരാൻ ശ്രമിക്കുന്ന മറ്റ് ലോകരാജ്യങ്ങളും ഈ വിഷയത്തെ അതീവ ജാഗ്രതയോടെയാണ് നോക്കിക്കാണുന്നത്.
