വാഷിംഗ്ടൺ: മിനസോട്ടയിൽ നിന്നുള്ള കോൺഗ്രസ് അംഗം ഇൽഹാൻ ഒമറിനെതിരെ ഗുരുതരമായ വ്യക്തിപരമായ ആരോപണങ്ങളുമായി മുൻ യുഎസ് പ്രസിഡന്റ് ഡൊണാൾഡ് ട്രംപ്. ഫ്ലോറിഡയിൽ നടന്ന പൊതുപരിപാടിയിൽ സംസാരിക്കവെയാണ്, ഇൽഹാൻ ഒമർ സ്വന്തം സഹോദരനെയാണ് വിവാഹം കഴിച്ചതെന്ന നേരത്തെ തള്ളിക്കളയപ്പെട്ട ആരോപണം ട്രംപ് വീണ്ടും ആവർത്തിച്ചത്.
ഒമറിന്റെ വിവാഹബന്ധം നിയമവിരുദ്ധമാണെന്ന് ആരോപിച്ച ട്രംപ്, പരിഹാസരൂപേണ അവരെ അനുകരിക്കുകയും ‘അധമ’ എന്ന് വിശേഷിപ്പിക്കുകയും ചെയ്തു. 2016 മുതൽ ഇന്റർനെറ്റിൽ പ്രചരിക്കുന്ന ഈ വ്യാജവാർത്ത പലതവണ തെളിയിക്കപ്പെടാത്തതാണെന്ന് വ്യക്തമായിട്ടുള്ളതാണ്. സൊമാലിയയിൽ ജനിച്ച് അഭയാർത്ഥിയായി അമേരിക്കയിലെത്തിയ ഒമർ രാജ്യം വിട്ടുപോകണമെന്നും ട്രംപ് പ്രസംഗത്തിൽ ആവശ്യപ്പെട്ടു.
ട്രംപിന്റെ പരാമർശങ്ങൾക്ക് എക്സിലൂടെ (X) ഒമർ ശക്തമായ മറുപടി നൽകി. 34 ക്രിമിനൽ കേസുകളിൽ ശിക്ഷിക്കപ്പെട്ട ഒരാളിൽ നിന്ന് ഇത്തരം വിഭ്രാന്തമായ പ്രലപനങ്ങളേ പ്രതീക്ഷിക്കുന്നുള്ളൂ എന്ന് അവർ തിരിച്ചടിച്ചു. ബലാത്സംഗക്കേസുകളിലും മറ്റും പ്രതിയായ ഒരാൾ സ്വന്തം പരാജയങ്ങളിൽ നിന്ന് ശ്രദ്ധ തിരിക്കാനാണ് ഇത്തരം കുപ്രചരണങ്ങൾ നടത്തുന്നതെന്നും അവർ കൂട്ടിച്ചേർത്തു.
ഇതാദ്യമായല്ല ട്രംപ് ഇൽഹാൻ ഒമറിനെ ലക്ഷ്യം വയ്ക്കുന്നത്. നേരത്തെ അവർക്ക് നേരെയുണ്ടായ ഒരു ആക്രമണം അവർ തന്നെ ആസൂത്രണം ചെയ്തതാണെന്നും ട്രംപ് ആരോപിച്ചിരുന്നു. ഇറാനുമായുള്ള യുഎസ് നിലപാടുകളെ വിമർശിക്കുന്നവർ രാജ്യദ്രോഹികളാണെന്നും ട്രംപ് ഇതേ പ്രസംഗത്തിൽ ആവർത്തിച്ചു. 2019 മുതൽ മിനിയാപൊളിസിനെ പ്രതിനിധീകരിക്കുന്ന ഇൽഹാൻ ഒമർ അമേരിക്കയിലെ പ്രമുഖ പുരോഗമന രാഷ്ട്രീയ നേതാക്കളിൽ ഒരാളാണ്.
