സിഡ്നി: ഓസ്ട്രേലിയയിലെ സിഡ്നിയിലുള്ള റോസ്മെഡോയിൽ ഒരു കുടുംബത്തിലെ മൂന്ന് പേരെ വീടിനുള്ളിൽ കൊല്ലപ്പെട്ട നിലയിൽ കണ്ടെത്തി. ഞായറാഴ്ച പുലർച്ചെ 1.30-ഓടെ ജൂലിയറ്റ് ക്ലോസിലെ വീട്ടിലായിരുന്നു ദാരുണമായ സംഭവം. 60-കളിൽ പ്രായമുള്ള ദമ്പതികളും അവരുടെ 25 വയസ്സുള്ള ഇളയ മകനുമാണ് കൊല്ലപ്പെട്ടത്. സംഭവവുമായി ബന്ധപ്പെട്ട് ദമ്പതികളുടെ മൂത്ത മകനായ 32-കാരനെ പോലീസ് കസ്റ്റഡിയിലെടുത്തു.
ക്രൂരമായ ആക്രമണമാണ് നടന്നതെന്നാണ് പോലീസ് നൽകുന്ന വിവരം. തലയ്ക്ക് മാരകമായി പരിക്കേറ്റ നിലയിൽ കണ്ടെത്തിയ 64-കാരനെയും 65-കാരിയായ ഭാര്യയെയും രക്ഷിക്കാൻ ശ്രമിച്ചെങ്കിലും സാധിച്ചില്ല. വീടിന് പിന്നിലെ ഗ്രാനി ഫ്ലാറ്റിലാണ് ഇളയ മകന്റെ മൃതദേഹം കണ്ടെത്തിയത്. ആക്രമണത്തിൽ പരിക്കേറ്റ രണ്ടാമത്തെ മകൻ (30 വയസ്സ്) ആണ് വിവരം പോലീസിനെ അറിയിച്ചത്. ഇയാൾ ചികിത്സയ്ക്ക് ശേഷം ആശുപത്രി വിട്ടു.
കൃത്യം നടന്നതിന് ഏകദേശം ഒരു മണിക്കൂറിന് ശേഷം ഒരു സിൽവർ സെഡാൻ കാറിൽ സ്ഥലത്തെത്തിയപ്പോഴാണ് പ്രതിയെ പോലീസ് പിടികൂടിയത്. കാറിൽ നിന്നിറങ്ങിയ ഇയാൾ പോലീസിന് മുന്നിൽ കൈകൾ ഉയർത്തി കീഴടങ്ങുകയായിരുന്നു. ആക്രമണത്തിന് ഒന്നിലധികം ആയുധങ്ങൾ ഉപയോഗിച്ചിട്ടുണ്ടെന്നും മാരകമായ മുറിവുകളുണ്ടാക്കുന്ന ആയുധത്തിന് പുറമെ ചുറ്റിക പോലുള്ള വസ്തുക്കളും ഉപയോഗിച്ചതായി സംശയിക്കുന്നുണ്ടെന്നും കാംബെൽടൗൺ കമാൻഡർ സൂപ്രണ്ട് ഗ്രാന്റ് ഹീലി പറഞ്ഞു.
ഏഷ്യൻ-ഓസ്ട്രേലിയൻ വംശജരായ ഈ കുടുംബം പ്രദേശത്ത് ശാന്തരായാണ് അറിയപ്പെട്ടിരുന്നത്. എന്നാൽ കഴിഞ്ഞ ഒരു വർഷത്തിനിടെ പലതവണ ആംബുലൻസ് ഈ വീട്ടിൽ എത്തിയിരുന്നതായി അയൽവാസികൾ മൊഴി നൽകിയിട്ടുണ്ട്. ഫോറൻസിക് വിദഗ്ധർ സ്ഥലത്തെത്തി തെളിവുകൾ ശേഖരിച്ചു. ഞായറാഴ്ച ഉച്ചയോടെ മൃതദേഹങ്ങൾ പോസ്റ്റ്മോർട്ടത്തിനായി മാറ്റി. സംഭവത്തിൽ പോലീസ് അന്വേഷണം ഊർജിതമാക്കിയിട്ടുണ്ട്.
