നെടുങ്കണ്ടം: സംസ്ഥാനതലത്തിലുണ്ടായ കനത്ത തിരിച്ചടി ഇടുക്കിയിലും പ്രതിഫലിച്ചതായി മുൻ മന്ത്രിയും സിപിഎം നേതാവുമായ എം.എം. മണി. കേരളത്തിലെ ജനങ്ങൾക്ക് വേണ്ടി എന്നും നിലകൊണ്ടിട്ടുള്ളത് ഇടതുപക്ഷമാണെന്നും, എന്നാൽ ഇപ്പോൾ യുഡിഎഫിന് വോട്ട് ചെയ്ത ജനങ്ങൾ വിഡ്ഢികളായിപ്പോയെന്നും അദ്ദേഹം പറഞ്ഞു. തിരഞ്ഞെടുപ്പ് ഫലം പുറത്തുവന്നതിന് പിന്നാലെ മാധ്യമങ്ങളോട് സംസാരിക്കുകയായിരുന്നു അദ്ദേഹം.
തിരഞ്ഞെടുപ്പ് ഫലം പൂർണ്ണമായി വരുന്നതിന് മുമ്പേ തന്നെ മുഖ്യമന്ത്രി സ്ഥാനത്തിനായി വടംവലി തുടങ്ങിയ ഒരു മുന്നണിക്കാണ് ജനങ്ങൾ വോട്ട് ചെയ്തതെന്ന് അദ്ദേഹം കുറ്റപ്പെടുത്തി. ഇത്തരമൊരു മുന്നണിയെ അധികാരത്തിലേറ്റിയവർക്ക് പിന്നീട് ദുഃഖിക്കേണ്ടി വരുമെന്നും മണി കൂട്ടിച്ചേർത്തു. ഇടുക്കി ജില്ലയിലെ എൽഡിഎഫ് സ്ഥാനാർത്ഥികളുടെ പരാജയവും സംസ്ഥാനത്തെ ഭരണമാറ്റവും ചർച്ച ചെയ്യുന്നതിനിടെയായിരുന്നു അദ്ദേഹത്തിന്റെ രൂക്ഷമായ പ്രതികരണം.
യുഡിഎഫിന്റെ വിജയം താൽക്കാലികം മാത്രമാണെന്നും ജനപക്ഷത്ത് നിന്നുള്ള പ്രവർത്തനം ഇടതുപക്ഷം തുടരുമെന്നും അദ്ദേഹം വ്യക്തമാക്കി. അതേസമയം, ജനവിധിയെ അധിക്ഷേപിക്കുന്ന തരത്തിലുള്ള എം.എം. മണിയുടെ പ്രസ്താവനയ്ക്കെതിരെ യുഡിഎഫ് രംഗത്തെത്തിയിട്ടുണ്ട്. ജനങ്ങൾ നൽകിയ തിരിച്ചടി ഉൾക്കൊള്ളാൻ തയ്യാറാകാത്തതുകൊണ്ടാണ് ഇത്തരം പരാമർശങ്ങൾ നടത്തുന്നതെന്ന് ഡിസിസി നേതൃത്വം പ്രതികരിച്ചു. വരും ദിവസങ്ങളിൽ ജില്ലയിലെ രാഷ്ട്രീയ വൃത്തങ്ങളിൽ ഈ പ്രസ്താവന വലിയ വിവാദങ്ങൾക്ക് വഴിവെക്കുമെന്നാണ് സൂചന
