ന്യൂഡൽഹി: ചോദ്യപേപ്പർ ചോർച്ചയെ തുടർന്ന് റദ്ദാക്കിയ നീറ്റ് യുജി (NEET-UG) പരീക്ഷ ജൂൺ 21 ന് വീണ്ടും നടത്താൻ നാഷണൽ ടെസ്റ്റിംഗ് ഏജൻസി (എൻടിഎ) തീരുമാനിച്ചു. കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ നടത്തിയ വാർത്താസമ്മേളനത്തിലാണ് പുതിയ തീയതി പ്രഖ്യാപിച്ചത്. പരീക്ഷാ ക്രമക്കേടുകൾ പൂർണ്ണമായും തടയുന്നതിനും ഭാവിയിൽ ഇത്തരം വീഴ്ചകൾ ആവർത്തിക്കാതിരിക്കാനും മന്ത്രാലയവും എൻടിഎയും കർശനമായ സുരക്ഷാ മുൻകരുതലുകൾ സ്വീകരിക്കുമെന്ന് അദ്ദേഹം ഉറപ്പുനൽകി.
പുനഃപരീക്ഷ എഴുതുന്ന വിദ്യാർത്ഥികൾക്ക് ജൂൺ 14 മുതൽ അഡ്മിറ്റ് കാർഡുകൾ ഡൗൺലോഡ് ചെയ്യാം. പരീക്ഷാ കേന്ദ്രങ്ങൾ തിരഞ്ഞെടുക്കുന്നതിൽ വിദ്യാർത്ഥികൾക്ക് ഇത്തവണ മുൻഗണന നൽകുമെന്നും ഇതിനായി ഒരു വാരത്തെ സമയം അനുവദിക്കുമെന്നും മന്ത്രി അറിയിച്ചു. പുനഃപരീക്ഷയ്ക്ക് പ്രത്യേക ഫീസ് ഈടാക്കില്ല. കൂടാതെ, വിദ്യാർത്ഥികൾക്ക് പരീക്ഷാ ഹാളിലെ നടപടിക്രമങ്ങൾ പൂർത്തിയാക്കാൻ അധികമായി 15 മിനിറ്റ് സമയം അനുവദിക്കും. ഉച്ചയ്ക്ക് 2 മണി മുതൽ വൈകിട്ട് 5.15 വരെയായിരിക്കും പരീക്ഷാ സമയം.
കമാൻഡ് ചെയിനിലുണ്ടായ സുരക്ഷാവീഴ്ചയാണ് പേപ്പർ ചോർച്ചയ്ക്ക് കാരണമായതെന്നും ഇതിന്റെ പൂർണ്ണ ഉത്തരവാദിത്തം സർക്കാർ ഏറ്റെടുക്കുന്നുവെന്നും കേന്ദ്രമന്ത്രി വ്യക്തമാക്കി. ക്രമക്കേടുകൾക്ക് പിന്നിൽ പ്രവർത്തിച്ച വിദ്യാഭ്യാസ മാഫിയകൾക്കെതിരെ വിട്ടുവീഴ്ചയില്ലാത്ത നടപടിയുണ്ടാകും. നിലവിൽ കേസ് അന്വേഷിക്കുന്ന സിബിഐ, എൻടിഎയിലെ ആഭ്യന്തര സുരക്ഷാ വീഴ്ചകളെക്കുറിച്ചും വിശദമായി അന്വേഷിക്കുന്നുണ്ട്.
പരീക്ഷാ നടത്തിപ്പിലെ സുതാര്യത വർദ്ധിപ്പിക്കുന്നതിനായി വരും വർഷങ്ങളിൽ വിപ്ലവകരമായ മാറ്റങ്ങൾ കൊണ്ടുവരുമെന്നും മന്ത്രി പ്രഖ്യാപിച്ചു. ചോദ്യപേപ്പർ കൈകാര്യം ചെയ്യുന്നതിലെ മനുഷ്യസഹജമായ പിഴവുകൾ ഒഴിവാക്കാൻ അടുത്ത വർഷം മുതൽ നീറ്റ് യുജി പരീക്ഷ ഒഎംആർ (OMR) ഷീറ്റ് മാതൃകയ്ക്ക് പകരം പൂർണ്ണമായും കമ്പ്യൂട്ടർ അധിഷ്ഠിത പരീക്ഷയായി (CBT) മാറ്റുമെന്നും ധർമേന്ദ്ര പ്രധാൻ കൂട്ടിച്ചേർത്തു. മേയ് 3 ന് നടന്ന പരീക്ഷയിൽ ക്രമക്കേട് കണ്ടെത്തിയതിനെ തുടർന്നാണ് 22 ലക്ഷത്തോളം വിദ്യാർത്ഥികൾ എഴുതിയ പരീക്ഷ കേന്ദ്രസർക്കാർ റദ്ദാക്കിയത്
