ഐക്യരാഷ്ട്രസഭയുടെയും അനുബന്ധ സ്ഥാപനങ്ങളുടെയും ഘടനാപരമായ പരിഷ്കാരങ്ങൾ അനിവാര്യമാണെന്ന് ഇന്ത്യ ആവശ്യപ്പെട്ടു. ന്യൂഡൽഹിയിൽ നടന്ന BRICS വിദേശകാര്യമന്ത്രിമാരുടെ യോഗത്തിലാണ് വിദേശകാര്യമന്ത്രി എസ് ജയശങ്കർ ഈ ആവശ്യം ശക്തമായി ഉന്നയിച്ചത്. യുഎൻ സുരക്ഷാ കൗൺസിൽ ഉൾപ്പെടെയുള്ള പ്രധാന അന്തർദേശീയ സ്ഥാപനങ്ങൾ ഇന്നത്തെ ആഗോള സാഹചര്യങ്ങൾക്ക് അനുസരിച്ച് മാറേണ്ടതുണ്ടെന്ന് ജയ്ശങ്കർ പറഞ്ഞു. നിലവിലുള്ള സ്ഥാപനങ്ങൾ രൂപീകരിക്കപ്പെട്ട കാലത്തേക്കാൾ ലോകം ഇന്ന് കൂടുതൽ സങ്കീർണവും ബഹുധ്രുവവുമാണെങ്കിലും ആവശ്യമായ പരിഷ്കാരങ്ങൾ നടപ്പായിട്ടില്ലെന്നും അദ്ദേഹം ചൂണ്ടിക്കാട്ടി.
സുരക്ഷാ കൗൺസിലിലെ സ്ഥിരവും അസ്ഥിരവുമായ അംഗത്വങ്ങൾ വികസിപ്പിക്കണമെന്നും ഏഷ്യ, ആഫ്രിക്ക, ലാറ്റിനമേരിക്ക മേഖലകൾക്ക് കൂടുതൽ പ്രാതിനിധ്യം ഉറപ്പാക്കണമെന്നും ഇന്ത്യ ആവശ്യപ്പെട്ടു. അർത്ഥവത്തായ പരിഷ്കാരങ്ങൾ ഇല്ലെങ്കിൽ യുഎന്റെ വിശ്വാസ്യതയും ഫലപ്രാപ്തിയും പരിമിതമായിത്തന്നെ തുടരുമെന്നും ജയ്ശങ്കർ മുന്നറിയിപ്പ് നൽകി.
അമേരിക്ക, ചൈന, റഷ്യ, യുകെ, ഫ്രാൻസ് എന്നീ അഞ്ച് സ്ഥിരാംഗങ്ങളുള്ള സുരക്ഷാ കൗൺസിലിൽ സ്ഥിരാംഗത്വം നേടുന്നതിനായി ഇന്ത്യ ദീർഘകാലമായി ശ്രമിച്ചുവരികയാണ്. ബ്രസീൽ, ജർമനി, ജപ്പാൻ എന്നിവരോടൊപ്പം ജി4 കൂട്ടായ്മയിലെ അംഗമായ ഇന്ത്യ, സുരക്ഷാ കൗൺസിൽ വികസിപ്പിക്കണമെന്ന ആവശ്യം തുടർച്ചയായി ഉയർത്തുന്ന രാജ്യങ്ങളിലൊന്നാണ്.
