തിരുവനന്തപുരം: പുതിയ യുഡിഎഫ് മന്ത്രിസഭയിൽ മുതിർന്ന കോൺഗ്രസ് നേതാവ് രമേശ് ചെന്നിത്തല ആഭ്യന്തര മന്ത്രിയാകും. വി ഡി സതീശന്റെ നേതൃത്വത്തിൽ അധികാരമേൽക്കുന്ന മന്ത്രിസഭയിലെ ഏറ്റവും പ്രധാനപ്പെട്ട വകുപ്പുകളിലൊന്നായ ആഭ്യന്തരം രമേശ് ചെന്നിത്തലയ്ക്ക് നൽകാൻ കോൺഗ്രസ് ഹൈക്കമാൻഡും സംസ്ഥാന നേതൃത്വവും തമ്മിൽ നടത്തിയ ചർച്ചകളിൽ അന്തിമ ധാരണയായി.
മുൻപ് ഉമ്മൻ ചാണ്ടി മന്ത്രിസഭയിലും ആഭ്യന്തര വകുപ്പ് കൈകാര്യം ചെയ്ത് മികച്ച പരിചയസമ്പത്തുള്ള നേതാവാണ് രമേശ് ചെന്നിത്തല. അതുകൊണ്ടുതന്നെ പുതിയ സർക്കാരിന്റെ പ്രതിച്ഛായ ആദ്യഘട്ടത്തിൽ തന്നെ ഉയർത്തിപ്പിടിക്കാൻ അദ്ദേഹത്തിന്റെ സാന്നിധ്യം സഹായിക്കുമെന്നാണ് പാർട്ടിയുടെ വിലയിരുത്തൽ. കഴിഞ്ഞ സർക്കാരിന്റെ കാലത്തുണ്ടായ ആഭ്യന്തര വകുപ്പിലെ വീഴ്ചകൾ തിരുത്തി മുന്നോട്ട് പോകാൻ പരിചയസമ്പന്നനായ ഒരു നേതാവ് തന്നെ വേണമെന്ന പൊതുവികാരമാണ് ഇതോടെ യാഥാർത്ഥ്യമാകുന്നത്.
രമേശ് ചെന്നിത്തലയ്ക്ക് പുറമെ കോൺഗ്രസിൽ നിന്നും മറ്റ് അഞ്ച് മന്ത്രിമാർ കൂടി മന്ത്രിസഭയിലേക്ക് എത്തുന്നുണ്ട്. ഇവരുടെ വകുപ്പുകൾ സംബന്ധിച്ചുള്ള പ്രാഥമിക ചർച്ചകളും പൂർത്തിയായിക്കഴിഞ്ഞു. ഘടകകക്ഷികളായ മുസ്ലിം ലീഗ് ഉൾപ്പെടെയുള്ള പാർട്ടികളുമായുള്ള വകുപ്പ് വിഭജന ചർച്ചകൾ അവസാന ഘട്ടത്തിലാണ്. മെയ് 18 തിങ്കളാഴ്ച തിരുവനന്തപുരം സെൻട്രൽ സ്റ്റേഡിയത്തിൽ വെച്ച് നടക്കുന്ന സത്യപ്രതിജ്ഞാ ചടങ്ങിൽ പുതിയ ആഭ്യന്തര മന്ത്രിയായി രമേശ് ചെന്നിത്തലയും മറ്റ് മന്ത്രിമാരും അധികാരമേൽക്കും.
