സിഡ്നി/മെൽബൺ: ഓസ്ട്രേലിയൻ ഫെഡറൽ ബജറ്റിലെ ഏറ്റവും നിർണായക പ്രഖ്യാപനമായ ‘നെഗറ്റീവ് ഗിയറിങ്’ (Negative Gearing) പരിഷ്കാരങ്ങൾക്ക് ശേഷമുള്ള ആദ്യ ശനിയാഴ്ച വിപണിയിൽ ദൃശ്യമായത് വലിയ മാറ്റങ്ങൾ. രാജ്യത്തുടനീളം നടന്ന പ്രോപ്പർട്ടി ലേലങ്ങളിൽ (Auctions) പ്രഥമ ഭവന വാങ്ങലുകാരുടെ (First home buyers) പങ്കാളിത്തം വർദ്ധിച്ചപ്പോൾ, നിക്ഷേപകർ കൂട്ടത്തോടെ പിൻവാങ്ങുന്നതായാണ് സൂചനകൾ.
പുതിയ നിയമപ്രകാരം കഴിഞ്ഞ ചൊവ്വാഴ്ച രാത്രി 7.30-ന് ശേഷം വാങ്ങുന്ന പ്രോപ്പർട്ടികൾക്ക് അടുത്ത വർഷം ജൂലൈ 1 വരെ മാത്രമേ നെഗറ്റീവ് ഗിയറിങ് ആനുകൂല്യം ലഭിക്കുകയുള്ളൂ. അതിനുശേഷം, പുതിയ നിർമ്മിതികൾക്കോ (New builds) ബജറ്റ് പ്രഖ്യാപനത്തിന് മുൻപ് വാങ്ങിയവയ്ക്കോ മാത്രമേ ഈ നികുതി ഇളവ് തുടരുകയുള്ളൂ. ആദ്യമായി വീട് വാങ്ങാൻ ലേലത്തിനെത്തിയ മാറ്റ് ബെക്ക്, ആനി ഇർഡ് എന്നിവർ സിഡ്നിയിലെ ഇന്നർ വെസ്റ്റിൽ ഇന്ന് ഭാഗ്യം പരീക്ഷിച്ചെങ്കിലും വിജയിച്ചില്ല. എങ്കിലും മുൻപത്തെപ്പോലെ വൻകിട നിക്ഷേപകരുമായി കടുത്ത മത്സരത്തിൽ ഏർപ്പെടേണ്ടി വന്നില്ലെന്ന് ഇവർ പ്രതികരിച്ചു. ലേലത്തിന് വെച്ചിരുന്ന പല വീടുകളും പെട്ടെന്ന് നേരിട്ടുള്ള വിൽപ്പനയിലേക്ക് (Sale) മാറ്റുന്നത് വിപണിയിലെ ആശങ്കയാണ് കാണിക്കുന്നതെന്ന് ആനി ചൂണ്ടിക്കാട്ടി.
തങ്ങളുടെ ആദ്യ വീടിനായി ശ്രമിക്കുന്ന യുവാക്കൾക്ക് നിക്ഷേപകരെക്കാൾ കൂടുതൽ അവസരങ്ങൾ ഒരുക്കുകയാണ് ഈ പരിഷ്കാരത്തിലൂടെ ലക്ഷ്യമിടുന്നതെന്ന് പ്രധാനമന്ത്രി ആന്റണി ആൽബനീസ് വ്യക്തമാക്കി. “സ്വന്തമായി താമസിക്കാൻ വീട് വാങ്ങുന്ന ഒരു യുവാവിനെതിരെ ലേലം വിളിക്കുന്ന നിക്ഷേപകന് ഇനിമുതൽ നികുതിപ്പണത്തിന്റെ ആനുകൂല്യം (Taxpayer support) കൂടെയുണ്ടാകില്ല” – പ്രധാനമന്ത്രി പറഞ്ഞു. വിപണിയിൽ താൽക്കാലികമായി ബയർമാരുടെ എണ്ണം കുറയുമെന്നും, നിക്ഷേപകർ കുറയുന്നതോടെ കൂടുതൽ പ്രഥമ ഭവന വാങ്ങലുകാർക്ക് വിപണിയിലേക്ക് വരാൻ അവസരമൊരുങ്ങുമെന്നും മൈ ഹൗസിംഗ് മാർക്കറ്റിലെ ചീഫ് ഇക്കണോമിസ്റ്റ് ആൻഡ്രൂ വിൽസൺ വിലയിരുത്തി.
അതേസമയം, ഗവൺമെന്റിന്റെ ഈ നീക്കത്തിനെതിരെ കടുത്ത വിമർശനവുമായി പ്രതിപക്ഷം രംഗത്തെത്തിയിട്ടുണ്ട്. ഈ പരിഷ്കാരം വിപണിയിൽ വീടുകളുടെ നിർമ്മാണം കുറയ്ക്കുമെന്നും, വാടക നിരക്കുകൾ കുത്തനെ ഉയരാൻ കാരണമാകുമെന്നും ഷാഡോ ട്രഷറർ ടിം വിൽസൺ കുറ്റപ്പെടുത്തി. ആദ്യ വീടിനായുള്ള യുവാക്കളുടെ നിക്ഷേപങ്ങൾക്ക് മേൽ കടുത്ത നികുതി ചുമത്തി അവരുടെ സ്വപ്നങ്ങളെ തകർക്കുന്ന നീക്കമാണിതെന്നും പ്രതിപക്ഷം ആരോപിച്ചു.
