അങ്കാറ: എഫ്-35 യുദ്ധവിമാന പദ്ധതിയിൽ വീണ്ടും ഉൾപ്പെടുന്നതിനും വിമാനങ്ങൾ സ്വന്തമാക്കുന്നതിനുമായി അമേരിക്കയുമായി ചർച്ചകൾ തുടരുകയാണെന്ന് തുർക്കി പ്രസിഡൻ്റ് റിസപ് തയ്യിബ് എർദോഗൻ അറിയിച്ചു. ഇക്കാര്യത്തിൽ അനുകൂലമായ പുരോഗതി പ്രതീക്ഷിക്കുന്നതായും അദ്ദേഹം പറഞ്ഞു.
കസാഖ്സ്ഥാനിൽനിന്നുള്ള മടക്കയാത്രയ്ക്കിടെ മാധ്യമപ്രവർത്തകരോട് സംസാരിക്കവെയാണ് എർദോഗൻ പ്രതികരിച്ചത്. തുർക്കി പ്രതിനിധിസംഘം അമേരിക്കൻ ഉദ്യോഗസ്ഥരുമായി ചർച്ച തുടരുകയാണെന്നും വിഷയത്തിൽ തങ്ങളുടെ നിലപാട് വ്യക്തമായിട്ടുണ്ടെന്നും അദ്ദേഹം വ്യക്തമാക്കി. തുർക്കി വികസിപ്പിച്ചുകൊണ്ടിരിക്കുന്ന അഞ്ചാം തലമുറ യുദ്ധവിമാനമായ “കാൻ” (KAAN) പദ്ധതിയുടെ പുരോഗതിയും എർദോഗൻ പരാമർശിച്ചു. ഈ പദ്ധതി പൂർത്തിയാകുന്നതോടെ രാജ്യത്തിന്റെ പ്രതിരോധ-വ്യവസായ രംഗത്ത് പുതിയ ഘട്ടത്തിന് തുടക്കമാകുമെന്ന് അദ്ദേഹം പറഞ്ഞു.
കൂടുതൽ ആധുനികവും ശക്തവുമായ ആയുധസംവിധാനങ്ങൾ വികസിപ്പിക്കാനുള്ള തുർക്കിയുടെ ദീർഘകാല പദ്ധതികളുടെ ഭാഗമാണ് ഇതെന്നും അദ്ദേഹം കൂട്ടിച്ചേർത്തു. റഷ്യയിൽനിന്ന് എസ്-400 മിസൈൽ പ്രതിരോധ സംവിധാനം വാങ്ങിയതിനെ തുടർന്ന് 2019-ൽ അമേരിക്ക തുർക്കിയെ എഫ്-35 പദ്ധതിയിൽനിന്ന് ഒഴിവാക്കിയിരുന്നു. ഇതിനെ തുർക്കി “അന്യായമായ നടപടി”യെന്ന നിലപാടിലാണ് കാണുന്നതെന്ന് മുൻപ് എർദോഗൻ വ്യക്തമാക്കിയിട്ടുണ്ട്.
ഇതിനിടെ, തുർക്കിയുടെ പ്രതിരോധ മേഖലയിൽ ആഗോളതലത്തിൽ കൂടുതൽ താൽപര്യം ഉയരുന്നതായും എർദോഗൻ പറഞ്ഞു. ഇസ്താംബൂളിൽ നടന്ന പ്രതിരോധ പ്രദർശനമായ സാഹ എക്സ്പോയിൽ 200-ലധികം പ്രതിരോധ ഉൽപ്പന്നങ്ങൾ പ്രദർശിപ്പിച്ചെന്നും ഏകദേശം എട്ട് ബില്യൺ ഡോളറിന്റെ കരാറുകൾ ഒപ്പുവെച്ചതായും അദ്ദേഹം അറിയിച്ചു.
