സിഡ്നി: ഓസ്ട്രേലിയയിലെ വിഖ്യാതമായ ‘വിവിഡ് സിഡ്നി’ (Vivid Sydney) ഉത്സവത്തിന്റെ ഭാഗമായി നടന്ന ഡ്രോൺ ലൈറ്റ് ഷോയ്ക്കിടെയുണ്ടായ വൻ സാങ്കേതിക തകരാറിനെ തുടർന്ന് തൊണ്ണൂറോളം ഡ്രോണുകൾ സിഡ്നി ഹാർബറിലെ കടലിൽ പതിച്ചു. തിങ്കളാഴ്ച രാത്രിയായിരുന്നു സംഭവം. ഷോ തുടങ്ങി പകുതിവഴിയിൽ വെച്ച് അപ്രതീക്ഷിതമായി നേരിട്ട സാങ്കേതിക തകരാറാണ് ഡ്രോണുകളുടെ ആകാശവിസ്മയത്തെ തകിടം മറിച്ചത്.
ഡ്രോണുകൾ പറന്നുയർന്നതിന് ശേഷം അന്തരീക്ഷത്തിലെ റേഡിയോ ഫ്രീക്വൻസിയിലുണ്ടായ അപ്രതീക്ഷിത മാറ്റമാണ് അപകടത്തിന് കാരണമായതെന്ന് ഷോയുടെ ഓപ്പറേറ്റർമാരായ ‘സ്കൈമാജിക്’ (SkyMagic) വ്യക്തമാക്കി. ഈ തരംഗവ്യതിയാനം കാരണം ഡ്രോൺ വ്യൂഹത്തിലെ പല യൂണിറ്റുകളുടെയും കൃത്യമായ സ്ഥാനം നിർണ്ണയിക്കുന്നതിൽ (Positional accuracy) പിഴവ് സംഭവിച്ചു. ഇതോടെ മുൻകൂട്ടി നിശ്ചയിച്ചിട്ടുള്ള ഓട്ടോമാറ്റിക് സുരക്ഷാ ലാൻഡിംഗ് സംവിധാനം (Automatic failsafe landing procedures) തനിയെ സജീവമാകുകയായിരുന്നു.
പ്രശ്നം ശ്രദ്ധയിൽപ്പെട്ടയുടൻ പൈലറ്റുമാർ ഡ്രോണുകളുടെ ചലനം നിയന്ത്രിക്കാൻ അടിയന്തരമായി ‘സ്റ്റോപ്പ്’ കമാൻഡ് നൽകുകയും, തകരാർ ബാധിക്കാത്ത ഡ്രോണുകളെ തിരികെ എത്തിക്കാനുള്ള പ്രോട്ടോക്കോൾ സജീവമാക്കുകയും ചെയ്തു. എന്നാൽ അടിയന്തര ലാൻഡിംഗ് പ്രക്രിയയ്ക്കിടെ ചില ഡ്രോണുകൾ ഷോയുടെ നിശ്ചിത സുരക്ഷാ അതിർത്തിയായ ‘ജിയോഫെൻസിൽ’ (Geofence) തട്ടുകയും ഇതോടെ ഇവയുടെ പ്രവർത്തനം പൂർണ്ണമായി നിലച്ച് വെള്ളത്തിലേക്ക് പതിക്കുകയുമാണുണ്ടായത്. ഫ്ലൈറ്റിന് മുൻപുള്ള പരിശോധനകളിലോ റിഹേഴ്സലുകളിലോ ഇത്തരം പ്രശ്നങ്ങൾ ഒന്നും തന്നെ കണ്ടെത്തിയിരുന്നില്ലെന്നും ഷോയ്ക്കായി നിശ്ചയിച്ചിരുന്ന സുരക്ഷാ അതിർത്തിക്ക് പുറത്തേക്ക് ഒരു ഡ്രോൺ പോലും പോയിട്ടില്ലെന്നും കമ്പനി സ്ഥിരീകരിച്ചു.
അപകടത്തെ തുടർന്ന് വിവിഡ് സിഡ്നി അധികൃതർ തിങ്കളാഴ്ച രാത്രി 9.30 ന് നടക്കേണ്ടിയിരുന്ന ഷോ റദ്ദാക്കിയിരുന്നു. വിദഗ്ദ്ധരായ ഓപ്പറേറ്റർമാരുടെയും ബന്ധപ്പെട്ട സർക്കാർ ഏജൻസികളുടെയും നേതൃത്വത്തിൽ സമഗ്രമായ സുരക്ഷാ വിലയിരുത്തലുകൾ നടത്തുന്നതിനായി ചൊവ്വ, ബുധൻ ദിവസങ്ങളിലെ രാത്രികാല പ്രകടനങ്ങൾ താൽക്കാലികമായി നിർത്തിവെച്ചിരിക്കുകയാണ്.
