തിരുവനന്തപുരം: മുൻ കണ്ണൂർ അഡീഷണൽ ജില്ലാ മജിസ്ട്രേറ്റ് നവീൻ ബാബുവിന്റെ മരണവുമായി ബന്ധപ്പെട്ട കേസിൽ അന്വേഷണം സിബിഐക്ക് കൈമാറുന്നതുമായി ബന്ധപ്പെട്ട സർക്കാർ തീരുമാനം ഇന്ന് ഉണ്ടായേക്കും. ഇക്കാര്യം സംബന്ധിച്ച് മന്ത്രിസഭാ യോഗത്തിൽ അന്തിമ തീരുമാനം ഉണ്ടാകുമെന്നാണ് സൂചന.
2024 ഒക്ടോബറിൽ കണ്ണൂരിലെ ഔദ്യോഗിക വസതിയിൽ നവീൻ ബാബുവിനെ മരിച്ച നിലയിൽ കണ്ടെത്തിയിരുന്നു. യാത്രയയപ്പ് ചടങ്ങിൽ അന്നത്തെ കണ്ണൂർ ജില്ലാ പഞ്ചായത്ത് പ്രസിഡന്റ് പി.പി. ദിവ്യ ഉന്നയിച്ച അഴിമതി ആരോപണങ്ങൾക്ക് പിന്നാലെയായിരുന്നു സംഭവം. കേസിൽ ആത്മഹത്യാ പ്രേരണക്കുറ്റം ചുമത്തി പി.പി. ദിവ്യയെ ഏക പ്രതിയാക്കിയിട്ടുണ്ട്.
സംസ്ഥാന പൊലീസ് അന്വേഷണത്തിൽ തൃപ്തരല്ലെന്ന് വ്യക്തമാക്കിയ നവീൻ ബാബുവിന്റെ കുടുംബം കേസ് സിബിഐക്ക് വിടണമെന്ന് ആവശ്യപ്പെട്ടിരുന്നു. മുഖ്യമന്ത്രിയുമായി കുടുംബാംഗങ്ങൾ നടത്തിയ കൂടിക്കാഴ്ചയ്ക്ക് പിന്നാലെയാണ് സിബിഐ അന്വേഷണം പരിഗണിക്കുന്നതെന്ന റിപ്പോർട്ടുകൾ പുറത്തുവന്നത്.
ഇതിനിടെ, കേസിൽ കൂടുതൽ അന്വേഷണം വേണമെന്ന കുടുംബത്തിന്റെ ആവശ്യം അംഗീകരിച്ച് തലശ്ശേരി അഡീഷണൽ സെഷൻസ് കോടതി നേരത്തെ ചില നിർണായക വിഷയങ്ങളിൽ വിശദമായ അന്വേഷണം നടത്താൻ നിർദേശിച്ചിരുന്നു.
