അമേരിക്കയും ഇറാനും തമ്മിൽ തുടരുന്ന നയതന്ത്ര ചർച്ചകൾ പരസ്പര അവിശ്വാസവും അമേരിക്കയുടെ വൈരുദ്ധ്യപരമായ നിലപാടുകളും കാരണം മുന്നോട്ട് പോകാനാകാതെ തടസപ്പെട്ടിരിക്കുകയാണെന്ന് ഇറാൻ വിദേശകാര്യ മന്ത്രാലയ വക്താവ് എസ്മായിൽ ബഖായി പറഞ്ഞു. ചർച്ചകളിൽ പുരോഗതി കൈവരിക്കാൻ അമേരിക്ക യുക്തിസഹമായ സമീപനം സ്വീകരിക്കണമെന്നും അദ്ദേഹം ആവശ്യപ്പെട്ടു.
അമേരിക്കൻ ആവശ്യങ്ങളിൽ നിരന്തരം മാറ്റം വരുന്നതും വ്യക്തതയില്ലാത്ത സന്ദേശങ്ങളുമാണ് ചർച്ചകൾ നീണ്ടുപോകാൻ കാരണമാകുന്നതെന്ന് ബഖായി ആരോപിച്ചു. ഇത് ഒരു നയതന്ത്ര തന്ത്രമാണോ അതോ അമേരിക്കൻ ഭരണകൂടത്തിനുള്ളിലെ അഭിപ്രായവ്യത്യാസങ്ങളുടെ പ്രതിഫലനമാണോ എന്നതിൽ വ്യക്തതയില്ലെന്നും അദ്ദേഹം പറഞ്ഞു. ഇറാന്റെ ആണവപരിപാടി, സാമ്പത്തിക ഉപരോധങ്ങൾ, ഹോർമുസ് കടലിടുക്കിലെ സാഹചര്യം, ഇറാന്റെ മരവിപ്പിച്ചിട്ടുള്ള വിദേശ നിക്ഷേപങ്ങൾ എന്നിവയാണ് പ്രധാന തർക്കവിഷയങ്ങൾ.
ഉപരോധങ്ങൾ പൂർണമായും പിൻവലിക്കുകയും വിദേശത്ത് മരവിപ്പിച്ചിട്ടുള്ള ഇറാന്റെ ഫണ്ടുകൾ വിട്ടുനൽകുകയും ചെയ്യണമെന്ന് ടെഹ്റാൻ ആവർത്തിച്ച് ആവശ്യപ്പെടുന്നുണ്ട്. ഇതിനിടെ പശ്ചിമേഷ്യയിൽ സംഘർഷാവസ്ഥ തുടരുകയാണ്. ഇറാനിയൻ ഡ്രോൺ വെടിവെച്ചിട്ട സംഭവത്തെ തുടർന്ന് അമേരിക്ക ഇറാനിലെ റഡാർ, ഡ്രോൺ നിയന്ത്രണ കേന്ദ്രങ്ങൾ ആക്രമിച്ചതും പിന്നാലെ ഇറാൻ അമേരിക്കൻ സൈനിക സാന്നിധ്യമുള്ള കേന്ദ്രങ്ങളെ ലക്ഷ്യമിട്ട് മിസൈൽ, ഡ്രോൺ ആക്രമണങ്ങൾ നടത്തിയതുമാണ് സ്ഥിതി കൂടുതൽ സങ്കീർണമാക്കിയത്.
അതേസമയം, മേഖലയിൽ സമാധാനശ്രമങ്ങൾ പൂർണമായും അവസാനിച്ചിട്ടില്ലെന്നും ചർച്ചകൾ തുടരാനുള്ള സാധ്യത ഇപ്പോഴും നിലനിൽക്കുന്നുണ്ടെന്നും ഇരുപക്ഷങ്ങളും സൂചന നൽകുന്നുണ്ട്. എന്നാൽ ആണവപരിപാടി, സുരക്ഷാ വിഷയങ്ങൾ, മേഖലാതല സംഘർഷങ്ങൾ എന്നിവയിൽ നിലപാടുകൾ തമ്മിലുള്ള വലിയ അന്തരം കാരണം ഉടൻ ഒരു ധാരണയിലെത്തുക പ്രയാസകരമാണെന്നാണ് വിലയിരുത്തൽ.
