പാരിസ്: റഷ്യയുടെ ഉപരോധലംഘന പ്രവർത്തനങ്ങളുമായി ബന്ധപ്പെട്ടതായി സംശയിക്കുന്ന എണ്ണക്കപ്പൽ ഫ്രാൻസ് നാവികസേന അറ്റ്ലാന്റിക് സമുദ്രത്തിൽ പിടിച്ചെടുത്തു. ഫ്രാൻസിന്റെയും ബ്രിട്ടന്റെയും സംയുക്ത പിന്തുണയോടെയാണ് നടപടി നടന്നത്. റഷ്യയുടെ എണ്ണക്കയറ്റുമതിക്ക് പാശ്ചാത്യ രാജ്യങ്ങൾ ഏർപ്പെടുത്തിയ ഉപരോധങ്ങൾ മറികടക്കാൻ ഉപയോഗിക്കുന്നതായി ആരോപിക്കപ്പെടുന്ന “ഷാഡോ ഫ്ലീറ്റ്” (Shadow Fleet) കപ്പലുകളുടെ ഭാഗമാണ് ഈ കപ്പലെന്ന് ഫ്രഞ്ച് അധികൃതർ ആരോപിക്കുന്നു.
ഫ്രാൻസിന്റെ ബ്രിട്ടനി തീരത്ത് നിന്ന് ഏകദേശം 400 നോട്ടിക്കൽ മൈൽ അകലെയുള്ള അന്താരാഷ്ട്ര സമുദ്രമേഖലയിലാണ് കപ്പൽ തടഞ്ഞത്. മുർമാൻസ്ക് തുറമുഖത്ത് നിന്ന് യാത്ര തിരിച്ച കപ്പൽ വ്യാജ പതാക ഉപയോഗിച്ചിരുന്നുവെന്നും കപ്പലിന്റെ രജിസ്ട്രേഷനുമായി ബന്ധപ്പെട്ട രേഖകളിൽ ക്രമക്കേടുകൾ കണ്ടെത്തിയതായും ഫ്രഞ്ച് അധികൃതർ അറിയിച്ചു. കപ്പലിന്റെ ക്യാപ്റ്റൻ ഫ്രഞ്ച് നാവികസേനയുടെ നിർദേശങ്ങൾ പാലിക്കാൻ ആദ്യം വിസമ്മതിച്ചതായും റിപ്പോർട്ടുകളുണ്ട്.
കപ്പലിൽ 23 ജീവനക്കാരുണ്ടെന്നാണ് റിപ്പോർട്ട്. കപ്പലിനെ ഫ്രഞ്ച് നിയന്ത്രണത്തിലുള്ള തുറമുഖത്തേക്ക് കൊണ്ടുപോയി കൂടുതൽ പരിശോധനകൾ നടത്തുകയാണ്. ദേശീയത തെളിയിക്കുന്ന രേഖകളില്ലാതെ സഞ്ചരിച്ചതിനും സമുദ്രനിയമങ്ങൾ ലംഘിച്ചതിനും ഫ്രഞ്ച് അധികൃതർ ക്രിമിനൽ അന്വേഷണം ആരംഭിച്ചിട്ടുണ്ട്.
അതേസമയം, ഫ്രാൻസിന്റെ നടപടി റഷ്യ ശക്തമായി അപലപിച്ചു. ഐക്യരാഷ്ട്രസഭയുടെ അനുമതിയില്ലാതെ ഏർപ്പെടുത്തിയ ഉപരോധങ്ങൾ നടപ്പാക്കാൻ ഫ്രാൻസിന് അധികാരമില്ലെന്നും റഷ്യ വാദിച്ചു. റഷ്യൻ പൗരന്മാരുടെ സുരക്ഷയെക്കുറിച്ച് വിവരങ്ങൾ ആവശ്യപ്പെട്ട് പാരിസിലെ റഷ്യൻ എംബസിയും രംഗത്തെത്തി.
2022-ൽ യുക്രൈനിനെതിരായ റഷ്യൻ അധിനിവേശത്തിന് പിന്നാലെ റഷ്യൻ എണ്ണവരുമാനം നിയന്ത്രിക്കാൻ യൂറോപ്യൻ യൂണിയനും പാശ്ചാത്യ രാജ്യങ്ങളും നിരവധി ഉപരോധങ്ങൾ ഏർപ്പെടുത്തിയിരുന്നു. അവ മറികടക്കാൻ ഉപയോഗിക്കുന്നതായി കരുതുന്ന “ഷാഡോ ഫ്ലീറ്റ്” കപ്പലുകൾക്കെതിരായ ഫ്രാൻസിന്റെ നാലാമത്തെ പ്രധാന നടപടിയാണിത്. ഏകദേശം 600 ഓളം കപ്പലുകൾ നിലവിൽ യൂറോപ്യൻ ഉപരോധ പട്ടികയിലുണ്ടെന്നാണ് റിപ്പോർട്ടുകൾ.
