മെൽബൺ: ചൈനീസ് വാഹന ഭീമന്മാരായ ബിവൈഡി (BYD) തങ്ങളുടെ പ്രത്യേക ചരക്കുകപ്പലായ ‘ബിവൈഡി ഷെങ്ഷൗ’ (BYD Zhengzhou) വഴി അയ്യായിരത്തോളം ഹൈബ്രിഡ്, ഇലക്ട്രിക് വാഹനങ്ങൾ ഓസ്ട്രേലിയയിൽ എത്തിച്ചു. കമ്പനിയുടെ ഏറ്റവും വേഗത്തിൽ വളരുന്ന വിദേശ വിപണികളിലൊന്നായ ഓസ്ട്രേലിയയിൽ സാന്നിധ്യം ശക്തമാക്കുന്നതിന്റെ ഭാഗമായി, 2026 മെയ്, ജൂൺ മാസങ്ങളിലായി 30,000 വാഹനങ്ങൾ എത്തിക്കാനുള്ള വലിയ പദ്ധതിയുടെ ഭാഗമായാണ് ഈ പുതിയ ഷിപ്മെന്റ്.
2026-ൽ ഓസ്ട്രേലിയയിൽ ഏറ്റവും കൂടുതൽ വിറ്റഴിക്കപ്പെടുന്ന വാഹന ബ്രാൻഡുകളുടെ മുൻനിരയിൽ ഇടംപിടിക്കാൻ ബിവൈഡിക്ക് സാധിച്ചിട്ടുണ്ട്. ടൊയോട്ട, മാസ്ഡ, കിയ, ഫോർഡ് തുടങ്ങിയ പ്രമുഖ മുൻനിര നിർമ്മാതാക്കൾക്കെതിരെ വിപണിയിൽ ശക്തമായ മുന്നേറ്റമാണ് കമ്പനി നടത്തുന്നത്. തങ്ങളുടെ തനതായ നിർമ്മാണ രീതിയും സ്വന്തമായി നിയന്ത്രിക്കുന്ന കപ്പൽ വ്യൂഹവുമാണ് ഉത്പാദനം വേഗത്തിലാക്കാനും വിദേശ വിപണികളിലേക്ക് ആവശ്യാനുസരണം വിതരണം സുഗമമാക്കാനും സഹായിക്കുന്നതെന്ന് കമ്പനി അധികൃതർ വ്യക്തമാക്കി. ഓസ്ട്രേലിയയിൽ വിൽക്കപ്പെടുന്ന പുതിയ വാഹനങ്ങളുടെ ഏറ്റവും വലിയ സ്രോതസ്സായി നിലവിൽ ചൈന മാറിയിരിക്കുകയാണ്. വിപണിയിലെ ചൈനീസ് ഓട്ടോമോട്ടീവ് ബ്രാൻഡുകളുടെ ഈ വൻ വളർച്ചയ്ക്ക് പിന്നിൽ ബിവൈഡി നിർണായക പങ്കാണ് വഹിക്കുന്നത്.
