മെൽബൺ: ഓസ്ട്രേലിയയിലെ പ്രമുഖ റേഡിയോ അവതാരകയായ കാരി ബിക്മോറിനെ (45) ശബ്ദധമനികളിലെ (Vocal cords) ഗുരുതരമായ തകരാറിനെത്തുടർന്ന് ആശുപത്രിയിൽ പ്രവേശിപ്പിച്ചു. വിദഗ്ദ്ധ ചികിത്സ ഉടനടി ലഭ്യമാക്കിയില്ലെങ്കിൽ ശബ്ദത്തിന് സ്ഥിരമായ തകരാർ സംഭവിക്കാൻ സാധ്യതയുണ്ടെന്ന ഡോക്ടർമാരുടെ മുന്നറിയിപ്പിനെത്തുടർന്നാണ് നടപടി. നിലവിൽ ഓസ്ട്രേലിയയിൽ ദേശീയതലത്തിൽ ശ്രദ്ധിക്കപ്പെടുന്ന ഒരു റേഡിയോ പ്രോഗ്രാമിന്റെ സഹ-അവതാരകയാണ് കാരി.
തന്റെ ശബ്ദത്തിന് കുറച്ചുകാലമായി അസ്വസ്ഥതകൾ ഉണ്ടായിരുന്നതായി കാരി ബിക്മോർ നേരത്തെ ശ്രോതാക്കളെ അറിയിച്ചിരുന്നു. ജോലിയിൽ നിന്നും സ്ഥിരമായി മാറിനിൽക്കേണ്ടി വരുന്ന സാഹചര്യം ഒഴിവാക്കാനാണ് ഇപ്പോൾ ചികിത്സയ്ക്കായി അവധിയെടുക്കുന്നതെന്ന് അവർ വ്യക്തമാക്കി. ഏതാനും ആഴ്ചകൾക്ക് മുൻപ് കാരിക്ക് തലയ്ക്ക് പരിക്കേറ്റതിനെത്തുടർന്ന് മറ്റൊരു മെഡിക്കൽ അത്യാഹിതവും ഉണ്ടായിരുന്നു. അന്ന് മുറിവ് തുന്നിക്കെട്ടാതെ പ്രത്യേക ഗ്ലൂ ഉപയോഗിച്ചാണ് ഒട്ടിച്ചിരുന്നത്. എന്നാൽ ഈ മുറിവ് ശരിയായി ഉണങ്ങിയിരുന്നില്ല. തുടർന്ന് വിമാനയാത്രയ്ക്കിടയിൽ ഒരു സഹയാത്രികയുടെ കൈവശമുണ്ടാ യിരുന്ന സ്യൂട്ട്കേസ് അബദ്ധത്തിൽ തലയിൽ വീണത് പരിക്കിന്റെ ആഘാതം വർദ്ധിപ്പിച്ചു. ഇതേത്തുടർന്ന് പേശികൾക്കും നാഡികൾക്കും ഉണ്ടായ ആഴത്തിലുള്ള തകരാർ പരിഹരിക്കാൻ പ്ലാസ്റ്റിക് സർജറി ഉൾപ്പെടെയുള്ള ചികിത്സകൾക്ക് അവർക്ക് വിധേയയാകേണ്ടി വന്നിരുന്നു.
കാരി ബിക്മോറിന്റെ അസാന്നിധ്യത്തിൽ സഹപ്രവർത്തകനാണ് നിലവിൽ റേഡിയോ പരിപാടിയുടെ താല്കാലിക ചുമതല ഏറ്റെടുത്തിരിക്കുന്നത്. ഇവർ എപ്പോൾ റേഡിയോ ഷോയിലേക്ക് തിരിച്ചെത്തുമെന്ന കാര്യത്തിൽ ഔദ്യോഗിക സ്ഥിരീകരണം വന്നിട്ടില്ല.
