ബിഹാർ ആശുപത്രി തീപിടിത്തം: മരണം ഏഴായി, ആശുപത്രിയുടെ രജിസ്ട്രേഷൻ സസ്പെൻഡ് ചെയ്തു
ബിഹാറിലെ മുസാഫർപുർ ജില്ലയിലെ സ്വകാര്യ ആശുപത്രിയിൽ ഉണ്ടായ തീപിടിത്തത്തിൽ മരിച്ചവരുടെ എണ്ണം ഏഴായി ഉയർന്നു. ആശുപത്രിയിലെ തീവ്രപരിചരണ വിഭാഗത്തിൽ (ICU) നിന്ന് രക്ഷപ്പെടുത്തിയ ഒരാൾ ശനിയാഴ്ച ചികിത്സയ്ക്കിടെ മരിച്ചതോടെയാണ് മരണസംഖ്യ വർധിച്ചത്.
ജൂൺ 4-ന് മുസാഫർപുറിലെ പ്രസാദ് ആശുപത്രിയിലാണ് അപകടമുണ്ടായത്. ഷോർട്ട് സർക്യൂട്ടിനെ തുടർന്ന് ഐ സി യു-വിൽ പുക നിറഞ്ഞതാണ് ദുരന്തത്തിന് കാരണമായതെന്നാണ് പ്രാഥമിക അന്വേഷണത്തിൽ കണ്ടെത്തിയത്. സംഭവദിവസം അഞ്ച് പേരും തുടർന്ന് വെള്ളിയാഴ്ച ഒരാളും മരിച്ചിരുന്നു. ശനിയാഴ്ച അഞ്ജനി കുമാർ സിങ് എന്ന രോഗി കൂടി മരണപ്പെട്ടതോടെ ആകെ മരണം ഏഴായി.
സുരക്ഷാ മാനദണ്ഡങ്ങൾ പാലിക്കുന്നതിൽ ആശുപത്രി അധികൃതർ ഗുരുതര വീഴ്ച വരുത്തിയെന്ന് കണ്ടെത്തിയതിനെ തുടർന്ന് ആശുപത്രിയുടെ രജിസ്ട്രേഷൻ തൽക്ഷണം സസ്പെൻഡ് ചെയ്തതായി ജില്ലാ ഭരണകൂടം അറിയിച്ചു. സംഭവവുമായി ബന്ധപ്പെട്ട് ആശുപത്രി മാനേജ്മെന്റിനോട് ഏഴ് ദിവസത്തിനകം വിശദീകരണവും രേഖകളും സമർപ്പിക്കാൻ നിർദേശിച്ചിട്ടുണ്ട്.
തീപിടിത്തവുമായി ബന്ധപ്പെട്ട് ആശുപത്രിയിലെ മൂന്ന് ജീവനക്കാരെ പൊലീസ് അറസ്റ്റ് ചെയ്തിട്ടുണ്ട്. മരണങ്ങൾ എല്ലാം പുക ശ്വസിച്ചതുമൂലമുള്ള ശ്വാസംമുട്ടലിനെ തുടർന്നാണെന്നും തീയിൽ പൊള്ളലേറ്റതല്ല മരണകാരണമെന്നും അഗ്നിശമന വിഭാഗം അധികൃതർ വ്യക്തമാക്കി. സംഭവത്തെ തുടർന്ന് ആശുപത്രികളിലെ അഗ്നിസുരക്ഷാ സംവിധാനങ്ങളും അടിയന്തര പ്രതികരണ സംവിധാനങ്ങളും സംബന്ധിച്ച് സംസ്ഥാനതലത്തിൽ പരിശോധന ശക്തമാക്കിയിട്ടുണ്ട്.
