മാസപ്പടി കേസുമായി ബന്ധപ്പെട്ട് മരവിപ്പിച്ച ബാങ്ക് അക്കൗണ്ടുകളിലെ നിക്ഷേപങ്ങൾ കണ്ടുകെട്ടുന്നതിനുള്ള നടപടികൾ വേഗത്തിലാക്കാൻ എൻഫോഴ്സ്മെന്റ് ഡയറക്ടറേറ്റ് (ഇഡി) തീരുമാനിച്ചു. പ്രതിപക്ഷനേതാവ് പിണറായി വിജയൻറെ മകൾ വീണ വിജയൻറെ അക്കൗണ്ടും മരവിപ്പിച്ച അക്കൗണ്ടുകളുടെ പട്ടികയിൽ ഉൾപ്പെട്ടിട്ടുണ്ടെന്നാണ് റിപ്പോർട്ട്.
അന്വേഷണത്തിന്റെ ഭാഗമായി മരവിപ്പിച്ച 242 ബാങ്ക് അക്കൗണ്ടുകളിലായി ഏകദേശം 18.36 കോടി രൂപയുണ്ടെന്ന് ഇഡി കണ്ടെത്തിയിട്ടുണ്ട്. ഈ തുക കണ്ടുകെട്ടുന്നതിനായി അഡ്ജുഡിക്കേറ്റിംഗ് അതോറിറ്റിക്ക് ഉടൻ റിപ്പോർട്ട് നൽകാനാണ് നീക്കം. വിവിധ റെയ്ഡുകളിൽ നിന്ന് പിടിച്ചെടുത്ത ബാങ്ക് രേഖകൾ, നിക്ഷേപ വിവരങ്ങൾ, ഡിജിറ്റൽ തെളിവുകൾ എന്നിവയുടെ പരിശോധനയും പുരോഗമിക്കുകയാണ്. വീണ വിജയൻ ഉൾപ്പെടെയുള്ളവരെ ചോദ്യം ചെയ്യുന്നതിനായി സമൻസ് നൽകാനും ഇഡി തയ്യാറെടുക്കുന്നതായാണ് വിവരം.
ഇതിനുമുമ്പ് നടത്തിയ പരിശോധനകളിൽ മൊബൈൽ ഫോൺ, സാമ്പത്തിക രേഖകൾ, നിക്ഷേപ സംബന്ധമായ രേഖകൾ, സി.എം.ആർ.എല്ലുമായി ബന്ധപ്പെട്ട രേഖകൾ എന്നിവ പിടിച്ചെടുത്തിരുന്നു. ബാങ്ക് ലോക്കറുകളും പരിശോധിക്കാനാണ് അന്വേഷണ ഏജൻസിയുടെ തീരുമാനം. സി.എം.ആർ.എൽ–എക്സാലോജിക് സാമ്പത്തിക ഇടപാടുകളുമായി ബന്ധപ്പെട്ട കള്ളപ്പണം വെളുപ്പിക്കൽ അന്വേഷണത്തിന്റെ ഭാഗമായാണ് ഇഡി നടപടികൾ മുന്നോട്ട് കൊണ്ടുപോകുന്നത്.
അന്വേഷണം തുടരുന്നതിന് തടസ്സം സൃഷ്ടിക്കണമെന്ന സി.എം.ആർ.എല്ലിന്റെ ഹർജി അടുത്തിടെ കേരള ഹൈക്കോടതി തള്ളിയിരുന്നു. ഇതോടെ അന്വേഷണത്തിന് നിയമപരമായ തടസ്സങ്ങൾ നീങ്ങിയതായാണ് വിലയിരുത്തൽ. ഇലക്ട്രോണിക് ഉപകരണങ്ങൾ, ബാങ്ക് രേഖകൾ, സാമ്പത്തിക ഇടപാട് വിവരങ്ങൾ എന്നിവയുടെ വിശദമായ പരിശോധന പൂർത്തിയാക്കിയ ശേഷം തുടർനടപടികളിലേക്ക് കടക്കുമെന്ന് ഇഡി വൃത്തങ്ങൾ സൂചിപ്പിക്കുന്നു.
