കിൻഷാസ: ഡെമോക്രാറ്റിക് റിപ്പബ്ലിക് ഓഫ് കോംഗോയിൽ (DRC) പടർന്നുപിടിക്കുന്ന എബോള വൈറസ് ബാധ ഗുരുതരമാകുന്നു. രാജ്യത്ത് സ്ഥിരീകരിച്ച എബോള മരണങ്ങൾ 100 കടന്നതായി ആരോഗ്യ അധികൃതർ അറിയിച്ചു. നിലവിൽ 550-ലധികം സ്ഥിരീകരിച്ച കേസുകളാണ് റിപ്പോർട്ട് ചെയ്തിട്ടുള്ളത്. ഇത്തവണത്തെ രോഗവ്യാപനത്തിന് കാരണമായിരിക്കുന്നത് അപൂർവമായ ബുണ്ടിബുഗ്യോ (Bundibugyo) വകഭേദമാണ്. ഈ വൈറസ് വകഭേദത്തിനെതിരെ നിലവിൽ അംഗീകൃത വാക്സിനോ പ്രത്യേക ചികിത്സയോ ലഭ്യമല്ലെന്ന് ലോകാരോഗ്യ സംഘടന (WHO) വ്യക്തമാക്കിയിട്ടുണ്ട്.
കോംഗോയിലെ ഇതുരി, നോർത്ത് കിവു, സൗത്ത് കിവു എന്നീ സംഘർഷബാധിത പ്രദേശങ്ങളിലാണ് രോഗവ്യാപനം കൂടുതൽ രൂക്ഷമായിരിക്കുന്നത്. സായുധ സംഘങ്ങളുടെ ആക്രമണങ്ങളും സുരക്ഷാ പ്രശ്നങ്ങളും ആരോഗ്യപ്രവർത്തകരുടെ പ്രവർത്തനങ്ങളെ ബാധിക്കുന്നതിനാൽ രോഗനിയന്ത്രണ നടപടികൾക്ക് തിരിച്ചടിയുണ്ടാകുന്നുവെന്ന് റിപ്പോർട്ടുകൾ സൂചിപ്പിക്കുന്നു. രോഗബാധിതരുമായി സമ്പർക്കത്തിൽ വന്നവരെ കണ്ടെത്തൽ, ചികിത്സ, സുരക്ഷിത സംസ്കാരം എന്നിവയുൾപ്പെടെയുള്ള പ്രവർത്തനങ്ങൾ തടസ്സപ്പെടുന്നതും സ്ഥിതി കൂടുതൽ സങ്കീർണമാക്കുന്നുണ്ട്.
അതേസമയം, രോഗവ്യാപനം നിയന്ത്രിക്കുന്നതിനായി WHOയും ആഫ്രിക്ക CDCയും സംയുക്തമായി പ്രത്യേക പ്രവർത്തനപദ്ധതി നടപ്പാക്കിവരികയാണ്.
