2026 ഫിഫ ലോകകപ്പിന്റെ ഉദ്ഘാടന മത്സരത്തിൽ ആതിഥേയരായ മെക്സിക്കോ ദക്ഷിണാഫ്രിക്കയെ എതിരില്ലാത്ത രണ്ട് ഗോളുകൾക്ക് പരാജയപ്പെടുത്തി. ഗ്രൂപ്പ് എയിലെ മത്സരത്തിൽ ജൂലിയൻ ക്വിനോനസും റൗൾ ജിമെനസുമാണ് മെക്സിക്കോയ്ക്കായി ഗോൾ നേടിയത്.
കളിയുടെ ഒമ്പതാം മിനിറ്റിൽ ദക്ഷിണാഫ്രിക്കൻ പ്രതിരോധത്തിന്റെ പിഴവ് മുതലെടുത്ത് ജൂലിയൻ ക്വിനോനസ് മെക്സിക്കോയെ മുന്നിലെത്തിച്ചു. തുടർന്ന് 67-ാം മിനിറ്റിൽ റൗൾ ജിമെനസ് ഹെഡറിലൂടെ രണ്ടാം ഗോൾ നേടി വിജയം ഉറപ്പിച്ചു. മത്സരത്തിന്റെ രണ്ടാം പകുതിയിൽ ദക്ഷിണാഫ്രിക്കയ്ക്ക് രണ്ട് ചുവപ്പ് കാർഡുകൾ ലഭിച്ചതോടെ അവർ ഒൻപത് പേരായി ചുരുങ്ങി.
മത്സരത്തിന്റെ ഇഞ്ചുറി ടൈമിൽ മെക്സിക്കോയുടെ സെസാർ മോണ്ടസിനും ചുവപ്പ് കാർഡ് ലഭിച്ചതോടെ ആതിഥേയരും 10 പേരുമായാണ് മത്സരം പൂർത്തിയാക്കിയത്. ലോകകപ്പ് ഉദ്ഘാടന മത്സരത്തിൽ മൂന്ന് ചുവപ്പ് കാർഡുകൾ പുറത്തെടുത്തത് ചരിത്രത്തിലാദ്യമായാണ്.
