മെക്സിക്കോയിലെ മോണ്ടെറെയിൽ നടന്ന ഫിഫ ലോകകപ്പ് ഗ്രൂപ്പ് എഫ് മത്സരത്തിൽ ടുണീഷ്യയെ 5-1ന് തകർത്ത് സ്വീഡൻ ലോകകപ്പ് പ്രചാരണത്തിന് മികച്ച തുടക്കം കുറിച്ചു. ഇരട്ടഗോൾ നേടിയ യാസിൻ അയാരിയാണ് സ്വീഡന്റെ വിജയശില്പി. അലക്സാണ്ടർ ഇസാക്, വിക്ടർ ഗ്യോകെറസ്, മാറ്റിയാസ് സ്വാൻബെർഗ് എന്നിവർ ഓരോ ഗോളും നേടി. ടുണീഷ്യയുടെ ആശ്വാസഗോൾ ഒമർ റെകിക്കിന്റെ വകയായിരുന്നു.
മത്സരത്തിന്റെ ഏഴാം മിനിറ്റിൽ ടുണീഷ്യൻ ഗോൾകീപ്പറുടെ പിഴവ് മുതലെടുത്ത് അയാരി ലോംഗ് റേഞ്ചറിലൂടെ സ്വീഡനെ മുന്നിലെത്തിച്ചു. 30-ാം മിനിറ്റിൽ ഇസാക് ലീഡ് ഇരട്ടിയാക്കി. ആദ്യപകുതി അവസാനിക്കും മുമ്പ് ഹന്നിബൽ മെജ്ബ്രിയുടെ ക്രോസിൽ നിന്ന് റെകിക് ഹെഡ്ഡറിലൂടെ ടുണീഷ്യയ്ക്കായി ഒരു ഗോൾ മടക്കിയതോടെ ഇടവേളയിൽ സ്കോർ 2-1 ആയി.
രണ്ടാം പകുതിയിൽ സ്വീഡൻ പൂർണ ആധിപത്യം പുലർത്തി. 59-ാം മിനിറ്റിൽ ഗ്യോകെറസ് മൂന്നാം ഗോൾ നേടി. തുടർന്ന് പകരക്കാരനായി ഇറങ്ങിയ സ്വാൻബെർഗ് നാലാം ഗോളും ഇഞ്ചുറി ടൈമിൽ അയാരി തന്റെ രണ്ടാം ഗോളും നേടി സ്വീഡന്റെ 5-1 വിജയമുറപ്പിച്ചു.
ഈ വിജയത്തോടെ ഗ്രൂപ്പ് എഫിൽ സ്വീഡൻ ഒന്നാം സ്ഥാനത്തെത്തി. നെതർലൻഡ്സും ജപ്പാനും തമ്മിലുള്ള ആദ്യ മത്സരം സമനിലയിൽ അവസാനിച്ചതിനാൽ സ്വീഡന് മികച്ച ഗോൾ വ്യത്യാസത്തിന്റെ ആനുകൂല്യവും ലഭിച്ചു.
