കോഴിക്കോട്: സംസ്ഥാന സർക്കാരിന്റെ അഭിമാനകരമായ ‘ഇന്ദിര ഗ്യാരന്റി’ പദ്ധതിയുടെ ഭാഗമായി കെ.എസ്.ആർ.ടി.സി. ഓർഡിനറി ബസുകളിൽ സ്ത്രീകൾക്കും ട്രാൻസ്ജെൻഡർ വ്യക്തികൾക്കുമായി പ്രഖ്യാപിച്ച ‘പ്രിയദർശിനി’ സൗജന്യ യാത്രാ പദ്ധതിയുടെ കോഴിക്കോട് ജില്ലാതല ഉദ്ഘാടനം നടന്നു. തിങ്കളാഴ്ച രാവിലെ 9 മണിക്ക് കോഴിക്കോട് മാവൂർ റോഡ് കെ.എസ്.ആർ.ടി.സി. ബസ് സ്റ്റാൻഡിൽ വെച്ച് നടന്ന ചടങ്ങിൽ എം.കെ. രാഘവൻ എം.പി പദ്ധതിയുടെ ഔദ്യോഗിക ഉദ്ഘാടനം നിർവഹിച്ചു.
സംസ്ഥാനത്തെ സാധാരണക്കാരായ വനിതകളുടെ സാമ്പത്തിക ഭദ്രത ഉറപ്പാക്കാനും പൊതുഇടങ്ങളിലെ പങ്കാളിത്തം വർദ്ധിപ്പിക്കാനും ലക്ഷ്യമിട്ടാണ് സർക്കാർ ഈ പദ്ധതി നടപ്പിലാക്കുന്നത്. പ്രായഭേദമന്യേ എല്ലാ സ്ത്രീകൾക്കും ട്രാൻസ്ജെൻഡർ വ്യക്തികൾക്കും കെ.എസ്.ആർ.ടി.സി.യുടെ ഓർഡിനറി സർവീസുകളിൽ ഇതിലൂടെ സൗജന്യമായി യാത്ര ചെയ്യാം. വരുമാന പരിധിയോ മറ്റ് സാമൂഹിക പദവികളോ ഇതിന് ബാധകമല്ല.
പദ്ധതി പ്രകാരം യാത്ര പൂർണ്ണമായും സൗജന്യമാണെങ്കിലും കൃത്യമായ അക്കൗണ്ടിങ്ങിനായി യാത്രക്കാർ കണ്ടക്ടറിൽ നിന്നും പൂജ്യം മൂല്യമുള്ള ‘സീറോ ടിക്കറ്റ്’ കൈപ്പറ്റേണ്ടതുണ്ട്. ഇതിനായി പ്രത്യേക തിരിച്ചറിയൽ രേഖകളോ മുൻകൂർ രജിസ്ട്രേഷനോ ആവശ്യമില്ല. സ്ത്രീകൾക്ക് പദ്ധതി ലഭ്യമാകുന്ന ബസുകൾ എളുപ്പത്തിൽ തിരിച്ചറിയുന്നതിനായി ‘പ്രിയദർശിനി’ എന്ന വലിയ സ്റ്റിക്കറുകൾ ബസുകളുടെ മുൻവശത്തും വാതിലുകൾക്ക് സമീപവും പതിപ്പിച്ചിട്ടുണ്ട്. ആദ്യ സർവീസുകളിൽ വനിതാ ഡ്രൈവർമാരും വനിതാ കണ്ടക്ടർമാരുമാണ് ഡ്യൂട്ടിയിലുണ്ടായിരുന്നത്. വിവിധ മണ്ഡലങ്ങളിലെ ജനപ്രതിനിധികളും രാഷ്ട്രീയ-സാമൂഹിക നേതാക്കളും ചടങ്ങിൽ പങ്കെടുത്തു.
